بابری مسجد کے مقام پر تعمیر کئے گئے رام مندر کی افتتاحی تقریب:راجستھان میں گوشت کی تمام دکانیں بند
نئی دہلی:بھارتی ریاست اتر پردیش کے شہر ایودھیا میں بابری مسجد کے مقام پر تعمیر کئے گئے رام مندر کی افتتاحی تقریب کی وجہ سے آج راجستھان میں ریاستی حکومت نے تمام مذبح خانے، گوشت اور مچھلی کی دکانیں بند کردیں۔
کشمیر میڈیا سروس کے مطابق گوشت کی دکانوںکو بند کرنے کا حکم راجستھان حکومت نے دیا ہے جن میں زیادہ تر دکانیںمسلمانوں کی ملکیت ہیں۔اس بندش کا اطلاق راجستھان کے تمام اداروں پر ہوتا ہے۔ مقامی حکومتوں کے محکمے کے ڈائریکٹر سریش کمار اولا نے راجستھان میں میونسپل حکام کو ہدایت کی ہے کہ وہ 22جنوری کو رام مندر کے احترام میں تمام مذبح خانے، گوشت اور مچھلی کی دکانیں بند کر دیں۔بھارتی حکومت نے آج (22جنوری کو ) ملک بھر میں مرکزی حکومت کے دفاتر، اداروں اور صنعتی اداروں کے لیے آدھے دن کی چھٹی کا اعلان کیا ہے۔بھارتی حکومت نے 19 جنوری کو ایک ہدایت نامہ جاری کیا جس میں تمام وزارتوں اور محکموں کو آدھے دن کی چھٹی کے بارے میں مطلع کیا گیا۔
