مقبوضہ جموں وکشمیر:پوسٹروں میں کشمیریوں سے 5 اگست کو یوم سیاہ منانے کی اپیل
سرینگر04 اگست (کے ایم ایس)
غیر قانونی طور پر بھارت کے زیر قبضہ جموں و کشمیر کے مختلف علاقوں میں پوسٹرز چسپاں کئے گئے ہیں جن میں کشمیریوں سے کل 5اگست کو یوم سیاہ کے طور پر منانے کی اپیل کی گئی ہے ۔
کشمیرمیڈیاسروس کے مطابق مودی کی فسطائی بھارتی حکومت نے 5اگست 2019کو مقبوضہ کشمیر کی خصوصی حیثیت کو منسوخ کر کے مقبوضہ علاقے کا فوجی محاصرہ کر لیاتھا۔وراثاء شہدا جموں و کشمیر، جموں کشمیر لبریشن الائنس، فلاح پارٹی جموں و کشمیر اور کشمیر ریزسٹنس الائنس کی طر ف سے سرینگر، بڈگام، سوپور، بارہمولہ، کپواڑہ ،پلوامہ، شوپیاں، کولگام اور مقبوضہ علاقے کے دیگر اضلاع کے مختلف علاقوں میں دیواروں، ستونوں اور بجلی کے کھمبوں پر پوسٹر چسپاں کیے گئے ہیں۔ پوسٹروں میں کشمیریوں سے کل 5اگست کو یوم سیاہ کے طورپر منانے کے علاوہ مکمل ہڑتال کرنے کی بھی اپیل کی گئی ہے تاکہ بھارت کوواضح پیغام دیا جاسکے کہ کشمیری اپنے مادر وطن پر اسکے جبری اور غیر قانونی تسلط کومسترد کرتے ہیں۔ پوسٹروں میں درج ہے کہ مقبوضہ و کشمیر کی تاریخ میں پانچ اگست کو سیاہ ترین دن کی حیثیت حاصل ہے کیونکہ اس دن قابض بھارت نے کشمیریوں کے حقوق پر ڈاکہ ڈالا تھا جسے نہ صرف کشمیریوں بلکہ عالمی برادری نے بھی مسترد کردیا ہے ۔ پوسٹر میں کشمیری عوام سے کہاگیا ہے کہ وہ 5 اگست کو مکمل ہڑتال کریں اور جگہ جگہ سیاہ جھنڈے لگاکر بھارت پر واضح کردیں کہ کشمیری عوام نے گزشتہ سات دہائیوں سے بھارت کے تسلط کو قبول نہیں کیا او رنہ آئندہ کریں گے۔ کشمیری عوام سے یہ بھی اپیل کی گئی کہ وہ اپنے ناقابل تنسیخ حق ،حق خود ارادیت کے حصول کیلئے اپنی پرامن جدوجہد جاری رکھیں تاکہ شہدائے کشمیر کا مشن پائیہ تکمیل تک پہنچ سکے۔
