جموں: گوجر بکروال طبقے کے گھروں کی مسماری کے خلاف احتجاج
کشمیرمیڈیاسروس کے مطابق گجروں اور بکروالوں سے تعلق رکھنے والے متاثرہ خاندان حکام کی جانب سے شروع کی گئی مسماری مہم کے خلاف سراپا احتجاج ہیں۔ ان کا کہنا ہے کہ وہ آٹھ دہائیوں سے زائد عرصے سے یہاں رہ رہے ہیں اور اب انہیں قابض انتظامیہ نے سردیوں میں بغیر کسی نوٹس کے بے گھر کر دیا ہے۔انہوں نے کہا کہ ہم اس وقت حیران رہ گئے جب پولیس اور دیگر سرکاری اہلکاروں کی ایک بڑی تعداد نے آکر ہمارے گھروں کو مسمار کیا۔کئی سماجی اور سیاسی کارکنوں نے مظاہرین میں شامل ہو کر مین روڈ بلاک کر دی۔ مظاہرین کو آگے بڑھنے سے روکنے کے لیے پولیس اہلکاروں کو بڑی تعداد میں تعینات کیا گیا تھا۔
پی ڈی پی کی صدر محبوبہ مفتی نے مسلم قبائل کے مکانات کے انہدام پر سوال اٹھاتے ہوئے مکینوں سے کہا کہ وہ اس طرح کے مظالم کے خلاف اٹھ کھڑے ہوں۔ کمیونسٹ پارٹی آف انڈیا مارکسٹ ) کے سینئر رہنما محمد یوسف تاریگامی نے کہاکہ مودی حکومت ایک طرف قبائلی برادریوں کو بااختیار بنانے کا دعویٰ کر رہی ہے جب کہ دوسری طرف ان کے ساتھ ایسا بہیمانہ سلوک کر رہی ہے ۔
