بھارت کا الفلاح یونیورسٹی پر قبضہ جمانے کا گھناؤنا منصوبہ
بھارت کی کارروائی اقلیتی حقوق کے دفاع کرنے والی آوازوں کو دبانے کیلئے ہے
نئی دہلی: ہندوستانی حکام نے ہریانہ کے فرید آباد میں الفلاح یونیورسٹی کے کیمپس کو منی لانڈرنگ کی روک تھام کے سخت قانون (PMLA) کے تحت منسلک کرنے کا فیصلہ کیا ہے۔ مبصرین کا کہنا ہے کہ قانونی اور مالی بے ضابطگیوں کے بہانے مسلمانوں کے زیر انتظام تعلیمی اداروں کو نشانہ بنانے کے وسیع نمونے کا حصہ ہے۔
کشمیر میڈیا سروس کے مطابق انفورسمنٹ ڈائریکٹوریٹ (ای ڈی)اس بات کی تحقیقات کر رہا ہے کہ آیا یونیورسٹی کی تعمیر کے لیے فنڈز مبینہ طور پر جرائم کی آمدنی سے حاصل کیے گئے تھے یا نہیں۔ الفلاح گروپ کے چیئرمین جواد احمد صدیقی کو ای ڈی نے نومبر میں گرفتار کیا تھا، حکام نے دعوی کیا تھا کہ یونیورسٹی کے پاس اپنے کورسز کیلئے مناسب منظوری نہیں تھی۔
ایجنسی الفلاح ٹرسٹ کے منقولہ اور غیر منقولہ اثاثوں کی شناخت اور ان کی قیمت لگارہی ہے جو یونیورسٹی اور اس سے منسلک اداروں کا مالک ہے، تاکہ جرائم کی مبینہ آمدنی کو فروخت یا ضائع ہونے سے روکا جا سکے۔ حکومت کی طرف سے مقرر کردہ وصول کنندہ کیمپس کا انتظام سنبھال سکتا ہے۔
یونیورسٹی پر بھارتی ایجنسیوں کی توجہ 10 نومبر کے لال قلعہ حملے کے بعد بڑھی جس میں الفلاح میڈیکل کالج کے ڈاکٹر عمرالنبی کو ملوث بتایا گیاتاہم ابھی تک اس الزام کی ٹھوس بنیاد موجود نہیں۔
ماہرین کے مطابق یہ کارروائی بھارت میں مسلمانوں کی جانب سے چلائے جانے والے تعلیمی اور سماجی اداروں کو دبانے کی حکمت عملی کا حصہ ہے، جس کا مقصد اقلیتوں کے حقوق کی وکالت کرنے والی آوازوں کو کمزور کرنا اور مسلم کی طاقت کو محدود کرنا ہے۔ ناقدین نے انتباہ کیا کہ اس طرح کے اقدامات، جو قانونی یا ریگولیٹری بہانوں کے تحت کیے جا رہے ہیں، اقلیتی کمیونٹی میں عدم تحفظ بڑھاتے ہیں اور تعلیم اور روزگار کو متاثر کر سکتے ہیں۔
جواد احمد صدیقی کے وکیل نے ایف آئی آر اور ای ڈی کے کیس کو "جھوٹا اور من گھڑت” قرار دیتے ہوئے الزامات کو مسترد کر دیا ہے۔
دریں اثنا، ای ڈی جنرل پاور آف اٹارنی دستاویزات کے مبینہ غلط استعمال اور ٹرسٹ سے منسلک دیگر لین دین کی تحقیقات جاری رکھے ہوئے ہیں۔
