عالمی برادری بھارت کو مقبوضہ جموں وکشمیر میں ظلم و بربریت سے روکے: صدر آصف علی زرداری
اسلام آباد:صدر مملکت آصف علی زرداری نے کہا ہے کہ بھارت نے گزشتہ سات دہائیوں سے زائد عرصے سے غیر قانونی طور پر اپنے زیر قبضہ جموں و کشمیر کے عوام کو ان حق سے محروم رکھا ہوا ہے اور انہیں ظلم و بربریت اور تشدد کا نشانہ بنا رہا ہے۔
کشمیرمیڈیاسروس کے مطابق آصف علی زرداری نے کشمیریوں کے یوم حق خودارادیت کے موقع پر اپنے پیغام میں کہاکہ بین الاقوامی برادری خاص طور پر اقوام ِمتحدہ کشمیری عوام سے کئے گئے وعدے کی تکمیل اور مقبوضہ جموں و کشمیر کے لوگوں کو ان کا ناقابل تنسیخ حق ِخود ارادیت دلانے کی ذمہ دار ہے۔ انہوں نے عالمی برادری پر زوردیا کہ وہ بھارت کو مقبوضہ جموں وکشمیر میں ظلم و بربریت اور انسانی حقوق کی خلاف ورزیوں سے روکے۔ آصف علی زرداری نے کہا کہ آج دنیا بھر کے کشمیری اقوامِ متحدہ کے کمیشن برائے ہندوستان اور پاکستان کی جانب سے منظور کردہ قرارداد کی 76ویں سالگرہ منا رہے ہیں۔اس قرارداد میں تنازعہ جموں و کشمیر کا حل اقوامِ متحدہ کی زیر نگرانی آزادانہ اور غیر جانبدارانہ استصواب رائے کے ذریعے ایک جمہوری طریقے سے کرنے کا فیصلہ کیا گیا تھا۔یہ قرارداد عالمی قوانین اور انسانی حقوق کے معاہدوں کے مطابق کشمیریوں کے ناقابل ِتنسیخ حق ِخودارادیت کا اعادہ کرتی ہے۔ صدر مملکت نے کہا کہ یہ امر افسوسناک ہے کہ بھارت نے گزشتہ سات دہائیوں سے زائد عرصے سے غیر قانونی طور پر زیر قبضہ جموں و کشمیر کے عوام کو اس حق سے محروم رکھا ہوا ہے اور انہیں ظلم وبربریت اور تشدد کا نشانہ بنا رہا ہے۔ 5اگست 2019سے بھارت ایسے اقدامات کر رہا ہے جن کا مقصد مقبوضہ جموں و کشمیر میں آبادی کا تناسب اور اس کا سیاسی ڈھانچہ تبدیل کرنا ہے تاکہ کشمیریوں کو ان کے اپنے ہی وطن میں بے اختیار کیا جا سکے۔ اِن مظالم کے باوجود کشمیری عوام کا جذبہ اٹوٹ ہے اور ان کی جدوجہد ِآزادی کو دبایا نہیں جا سکتا۔صدر مملکت نے کہا کہ اقوام متحدہ کی جنرل اسمبلی ہر سال لوگوں کے حق خود ِارادیت کے حوالے سے ایک قرارداد منظور کرتی ہے جو جبری قبضے کے حالات میں رہنے والے لوگوں کی حالت ِزار اور حقوق کی طرف بین الاقوامی توجہ مبذول کراتی ہے۔ بین الاقوامی برادری خاص طور پر اقوام ِمتحدہ اس وعدے کی تکمیل اورمقبوضہ جموں و کشمیر کے لوگوں کو ان کا ناقابل تنسیخ حق ِخود ارادیت دلانے کی ذمہ دار ہے۔میں آج عالمی برادری سے مطالبہ کرتا ہوں کہ وہ بھارت کو مقبوضہ جموں وکشمیر میں ظلم و بربریت اور انسانی حقوق کی خلاف ورزیوں سے روکے۔ صدر مملکت نے اس عزم کا اعادہ کیا کہ پاکستان اقوام متحدہ کی سلامتی کونسل کی متعلقہ قراردادوں کے مطابق بہادر کشمیری عوام کی منصفانہ جد و جہد اور حق ِخودارادیت کے حصول میں ان کی مکمل سیاسی، سفارتی اور اخلاقی حمایت جاری رکھے گا۔
