سرینگر:انتظامیہ نے پھر لوگوں کو جامع مسجد میں نماز جمعہ ادا نہیں کرنے دی

سرینگر11 فروری (کے ایم ایس)بھارت کے غیر قانونی زیر قبضہ جموں و کشمیر میں قابض بھارتی انتظامیہ نے آج ایک مرتبہ پھر لوگوں کی سرینگر کی تاریخی جامع مسجد میں نماز جمعہ ادا کرنے سے روک دیا۔
جامع مسجد کی انجمن اوقاف نے ایک بیان میں کہا کہ یہ لگاتار 28 واں جمعہ ہے کہ عظیم الشان مسجد میں نماز جمعہ کی اجازت نہیں دی گئی۔ انجمن اوقاف نے انتظامیہ کے اس اقدام کو انتہائی افسوس ناک اور قابل مذمت قرار دیا۔ بیان میںکہا گیا کہ ایسا کرنے سے انتظامیہ مسلمانوں کے دینی جذبات کو ٹھیس پہنچا رہی ہے جو کہ ہر لحاظ سے قابل مذمت ہے۔انجمن نے کہا کہ کشمیری عوام کے سرکردہ مذہبی رہنما میر واعظ عمر فاروق گزشتہ ڈھائی برس سے گھر میں نظر بند ہیں جس کی وجہ سے وہ اپنی مذہبی ذمہ داریوں کی ادائیگی سے قاصر ہیں۔انجمن نے کہا کہ یہ بات انتہائی حیران کن ہے کہ پرامن احتجاج اور معاشرے کے تمام طبقات کی آوازوں کے باوجود حکام جامع مسجد کو نماز جمعہ کے لیے کھولنے کی اجازت نہیں دے رہے اور میرواعظ کو بھی رہا نہیں کر رہے۔