قابض انتظامیہ کی عوام دشمن پالیسیوں کیخلاف احتجاجی مظاہرے
سرینگر 02مارچ (کے ایم ایس) 
مختلف سرکاری محکموں میں کام کرنے والے ڈیلی ویجر ملازمین نے اپنی ملازمتوں کی مستقلی کیلئے سرینگر میں ایک بڑااحتجاجی مظاہرہ کیا۔ احتجاجی مظاہرے کا اہتمام جموں و کشمیر کیجول لیبررز یونائیٹڈ فرنٹ نے کیا تھا۔مظاہرین کا کہنا تھاکہ وہ گزشتہ 14برس سے مختلف سرکاری محکموں میں خدمات انجام دے رہے ہیں اورانہیں طویل عرصے بعد بھی مستقل نہیں کیاگیا ہے ۔ انہوں نے قابض حکام پر مقبوضہ علاقے میں کم از کم اجرت ایکٹ کے نفاذ پر زوردیا۔مظاہرین کی طرف سے پریس انکلیو سے سٹی سینٹر کی طرف آگے جانے کی کوشش کرنے پر بھارتی پولیس نے متعدد مظاہرین کو گرفتار کرلیا ۔
ادھر ضلع بارہمولہ کے قصبے سوپورمیں دکانداروں نے پورے قصبے میں مختلف مقامات پر سڑکوں پر رکاوٹیں اور ڈیوائیڈرز لگانے کے خلاف اقبال بازار میں گھنٹہ گھر چوک کے قریب احتجاجی مظاہرہ کیا ۔ مظاہرین نے قابض انتظامیہ کے خلاف نعرے بھی بلند کئے۔ انہوں نے کہاکہ سڑکوں پر رکاوٹیں کھڑی کئے جانے کی وجہ سے ان کے کاروبار بری طرح متاثرہوئے ہیں ۔
