سرینگر: غوث اعظم ؒکے عرس کی اختتامی تقریبات
سرینگر:بھارت کے غیر قانونی زیر قبضہ جموں وکشمیر میں پیران پیر حضرت شیخ سید عبدالقادر جیلانی ؒ کے سالانہ عرس کی تقریبات نہایت عقیدت و احترام کیساتھ اختتام کوپہنچیں۔
کشمیر میڈیاسروس کے مطابق خانیار سرینگر کی زیارت پر رات بھر شب خوانی ہوئی جس دوران علمائے کرام اور آئمہ مساجد نے غوث اعظم ؒ کی زندگی کے مختلف گوشوں پر روشنی ڈالی جبکہ نعت خوانوں نے نعتیہ کلا م پڑھے ۔وادی کشمیر میں جمعہ کے روزعرس کی اختتامی تقریب کے حوالے سے بڑے بڑے اجتماعات منعقد ہوئے جن میں ہزاروںکی تعداد میں زائرین نے شرکت کی ۔ سب سے بڑی تقریب خانیارسرینگر میں ہوئی جہاں وادی کے مختلف علاقوں سے آئے ہوئے فرزندان توحید نے شب خوانی کی اور روح پرور مجالس میں حصہ لیا۔ خانیار اور سرائے بالا میں نماز جمعہ کے بعد زائرین کو غوث اعظم کے موئے مبارک کے دیدار کرائے گئے۔مبلغین، آئمہ اور علمائے کرام نے تقریبات سے خطاب میں عوث اعظم ؒکی تعلیمات اور طرز حیات کو اپنانے پر زور دیا۔
