فاروق عبداللہ نے ہسپتال میں مولانا عباس انصاری کی خیریت دریافت کی
سرینگر04ستمبر(کے ایم ایس)غیر قانونی طور پربھارت کے زیر قبضہ جموں و کشمیر میں نیشنل کانفرنس کے صدر فاروق عبداللہ نے سرینگر کے صورہ انسٹی ٹیوٹ آف میڈیکل سائنسزمیں زیر علاج کل جماعتی حریت کانفرنس کے سینئر رہنما مولانا عباس انصاری کی خیریت دریافت کی ہے۔
فاروق عبداللہ نے ان کی جلد اور مکمل صحت یابی کے لئے نیک خواہشات کا اظہارکیا۔ ان کے ہمراہ پارٹی رہنما ناصر اسلم وانی، تنویر صادق اور سلمان علی ساغر بھی تھے۔
دریں اثنا ء کل جماعتی حریت کانفرنس کے سینئر رہنما آغا سید حسن الموسوی الصفوی نے سرینگر میں ایک بیان میں ممتاز صحافی مزمل جلیل کی والدہ محمودہ فاضلی کے انتقال پر دکھ اورافسوس کا اظہار کیاہے۔انہوں نے مزمل جلیل اور مرحومہ کے دیگر لواحقین سے اظہار یکجہتی کرتے ہوئے دعا کی کہ اللہ تعالی مرحومہ کو جوار رحمت میں جگہ دے اور سوگوارخاندان کو یہ ناقابل تلافی نقصان برداشت کرنے کی توفیق عطا فرمائے۔
