بھارتی فوج کشمیریوں کی نقل وحرکت پر نظر رکھنے کیلئے ملٹی کاپٹر ڈرونز استعمال کرے گی
جموں 07 ستمبر (کے ایم ایس)
غیر قانونی طور پر بھارت کے زیر قبضہ جموں و کشمیر میں بھارتی فوج لوگوں کی نقل و حرکت پر کڑی نظر رکھنے کے لیے اپنے ملٹی کاپٹر ڈرونزاستعمال کرے گی ۔
کشمیرمیڈیاسروس کے مطابق میڈیا رپورٹس نے ذرائع کے حوالے سے بتایا گیا ہے کہ یہ ڈرونز جدید ٹیکنالوجی سے لیس ہیں جو دن اوررات کے اوقات میں نگرانی کی صلاحیت رکھتے ہیں ۔جموں کے روزنامے ارلی ٹائمز کی پورٹ کے مطابق یہ ڈرون دن کے اوقات کے علاوہ انفرا ریڈ اور دیگر جدیدٹیکنالوجیز استعمال کرتے ہوئے رات کے وقت بھی لوگوں کی نقل و حرکت پر نظر رکھنے کی صلاحیت رکھتا ہے ۔اطلاعات میں اس ڈرون کے اہم تکنیکی پہلوئوں کے بارے میں بتایاگیا ہے کہ ملٹی کاپٹرڈرونز انتہائی اونچی پرواز اور طویل فاصلے تک نگرانی کرنے کے علاوہ تھرمل امیجنگ اور دیگر خصوصیات کے حامل ہیں ۔یہ ڈرونز کنٹرول لائن اور ورکنگ بانڈری کے ساتھ علاقوں میں تعینات کیے جائیں گے اور انہیں تلاشی اور محاصرے کی کارروائیوں کے دوران بھی استعمال کیاجاسکتا ہے ۔
