جھٹکے پہ جھٹکا: ٹرمپ کا بھارت پر مزید 25 فیصد ٹیرف لگانے کا اعلان ، مجموعی ٹیرف 50 فیصد ہوگیا
واشنگٹن:
امریکی صدر ڈونلڈ ٹرمپ نے بھارت سے درآمدات پر مزید 25 فیصد ٹیرف عائد کر دیا، جس کے بعد بھارت پر مجوعی ٹیرف 50 فیصد ہو گیا۔کشمیر میڈیا سروس کے مطابق غیر ملکی خبر رساں ادارے ’رائٹرز‘ نے خبر دی کہ ہے کہ ڈونلڈ ٹرمپ کی جانب سے جاری ایگزیکٹو آرڈر کے تحت بھارت پر مزید 25 فیصد ٹیرف عائد کر دیا گیا۔یا د رہے کہ گزشتہ روز امریکی صدر ڈونلڈ ٹرمپ نے کہا تھا کہ بھارت سے درآمدات پر موجودہ 25 فیصد ٹیرف کو اگلے 24 گھنٹوں میں ’نمایاں طور پر ’ بڑھا دیں گے کیونکہ نئی دہلی نے روس سے تیل کی خریداری جاری رکھی ہوئی ہے۔
ٹرمپ نے سی این بی سی کو ایک انٹرویو میں کہا تھا کہ ’بھارت ایک اچھا تجارتی پارٹنر نہیں رہا، اس لیے ہم نے 25 فیصد ٹیرف لگانے کا فیصلہ کیا تھا لیکن میں اگلے 24 گھنٹوں میں اس میں بہت زیادہ اضافہ کرنے جا رہا ہوں کیونکہ وہ روسی تیل خرید رہا ہے۔‘
قبل ازیں 30 جولائی کو صدر ڈونلڈ ٹرمپ نے بھارت پر 25 فیصد ٹیرف عائد کرنے کا اعلان کیا تھا، جبکہ روس سے مسلسل فوجی ساز و سامان اور تیل کی خریداری پر بھارت پر جرمانہ بھی عائد کر دیا تھا۔
