پلوامہ میں بھارتی پیراملٹری کو اراضی منتقلی کے خلاف زبردست ا حتجاجی مظاہرہ
سرینگر 13 نومبر (کے ایم ایس) غیر قانونی طور پر بھارت کے زیر قبضہ جموں و کشمیر میں آج ضلع پلوامہ کے علاقے کاکہ پورہ میں لوگوں نے بھارتی پیراملٹری سینٹرل ریزرو پولیس فورس کو اراضی کی منتقلی کے خلاف زبردست ا حتجاجی مظاہرہ کیا ۔
کشمیرمیڈیا سروس کے مطابق ضلع پلوامہ کے علاقے اوکھو کاکہ پورہ میں آج سینکڑوں لوگ جمع ہوگئے اوروہ قابض حکام سے اراضی منتقلی کے فیصلے کو واپس لینے کامطالبہ کررہے تھے ۔ مظاہرین”انصاف دو، فیصلہ واپس لو“ کے نعرے لگارہے تھے ۔مقامی لوگوں کا کہنا تھا کہ قابض انتظامیہ نے علاقے میں تقریباً 100 کنال اراضی کی نشاندہی کی ہے تاکہ اسے بھارتی پیراملٹری سینٹرل ریزرو پولیس فورس کو منتقل کیا جائے۔ان کا کہنا تھا کہ اس زمین پر سی آر پی ایف کا ایک بڑا کیمپ قائم کیا جا رہا ہے لیکن وہ قابض حکومت کو کبھی اس زمین پر سی آر پی ایف کالونی تعمیر کرنے کی اجازت نہیں دیں گے۔
