فریڈم موومنٹ کے قائدین کی طرف سے نہتے کشمیریوں پر بھارتی ظلم و تشدد کی مذمت
اسلام آباد 15 نومبر (کے ایم ایس)
جموں وکشمیر فریڈم موومنٹ کی اکائیوں کے قائدین مصطفی محمد حسین خطیب، محمود اختر قریشی، مشتاق احمد زرگر، محمد لطیف لون،محمد اشفاق بروال اور عمار عامر گندنہ اسلام آبادمیں ایک اجلاس میں بھارت کے غیر قانونی زیر تسلط جموں وکشمیر کی تیزی سے بگڑتی ہوئی صورتحال اور بھارت کی جانب سے نہتے کشمیریوں پر ظلم و تشدد اور حریت رہنمائوں کی مسلسل غیر قانونی نظربندی پر شدید تشویش ظاہر کی گئی۔
کشمیرمیڈیاسروس کے مطابق مصطفی محمد حسین خطیب کی زیر صدارت اجلاس میں فریڈم موومنٹ کے راجوری، پونچھ ،جموں، کشتواڑ اور ریاسی سے تعلق رکھنے والے قائدین نے بھی آن لائن شرکت کی۔اس موقع پر مقبوضہ کشمیر میں پائیدارامن اور ہم آہنگی کے قیام پر زوردیاگیا ۔رہنمائوں نے ٹی ٹونٹی عالمی کپ میں پاکستان کی حمایت کرنے پر بھارت کے مختلف کالجوں اور یونیورسٹیوں میں کشمیری طلبہ پر بھارتی پولیس ہلکاروں کی سرپرستی میں بی جے پی، وشوہندو پریشد، شو سینا اور دیگر ہندوتوا فرقہ پرستوں کے حملوں اور مقدمات کے اندراج کی شدید مذمت کی ۔ انہوں نے اقوام متحدہ اوراسلامی تعاون تنظیم سے اپیل کی کہ وہ بھارت کو کشمیری نوجوانوں کے خلاف جھوٹے مقدمات کے اندراج سے روکیں۔
