سرینگر میں یاسین ملک کی رہائش گاہ کے باہر بھارت کے خلاف مظاہرہ
مظاہرین پر آنسو گیس کی شیلنگ ،مظاہرین اور بھارتی فورسز کے درمیان جھڑپیں
سرینگر25مئی(کے ایم ایس) غیر قانونی طور پربھارت کے زیرقبضہ جموں و کشمیر میں لوگوں نے جموں و کشمیر لبریشن فرنٹ کے چیئرمین محمد یاسین ملک کی رہائش گاہ کے باہر بھارت کے خلاف زبردست احتجاجی مظاہرہ کیا۔
کشمیر میڈیا سروس کے مطابق علاقے میں بھارتی فوجیوں اور پولیس کی بھاری نفری کی تعیناتی کے باوجود لوگ جن میں پڑوسی ،رشتہ داراورعام شہری شامل ہیں ،سرینگر کے علاقے مائسمہ میں یاسین ملک کے گھر پر جمع ہورہے ہیں۔ لوگوں کی بڑی تعداد نے جس میں خواتین بھی شامل تھیں، احتجاجی مظاہرے میں شرکت کی اور بھارتی حکومت کی طرف سے یاسین ملک کو نشانہ بنائے جانے کی مذمت کی۔ انہوں نے یاسین ملک کی رہائی اور آزادی کے حق میں فلک شگاف نعرے لگائے۔بھارتی پولیس نے مظاہرین کو منتشر کرنے کے لیے آنسو گیس کے گولے داغے جس سے مظاہرین اور بھارتی فورسز کے درمیان جھڑپیں شروع ہو گئیں۔
دریں اثناء بھارتی پولیس علاقے پر کڑی نظر رکھنے کے لیے ڈرونز استعمال کررہی ہے۔
