ویبینارمیں مقبوضہ کشمیر کی خواتین کو درپیش مشکلات کو اجاگر کیاگیا
اسلام آباد:خواتین کے عالمی دن کے موقع پر کشمیر انسٹی ٹیوٹ آف انٹرنیشنل ریلیشنزاور انٹرنیشنل مسلم ویمن یونین کے زیر اہتمام "خواتین کے حقوق: مساوات کی طرف سفر” کے عنوان سے ایک ویبینار منعقد کیاگیا۔
کشمیر میڈیا سروس کے مطابق ویبینار کے مقررین میں انسانی حقوق کی امریکی علمبردار میری سکلی، جموں کشمیر تحریک حق خوداردیت برطانیہ کی چیئرپرسن نائلہ شریف؛ آسٹریلیا سے ڈاکٹر فارا، صاحبزادی مردیہ سلطانہ فیض پوری، میرپور یونیورسٹی آف سائنس اینڈ ٹیکنالوجی کی پروفیسر ڈاکٹر سائرہ شاہ اور نیشنل ڈیفنس یونیورسٹی کی ڈاکٹر شاہین اختر شامل تھیں۔ پینلسٹس نے کشمیری خواتین کو درپیش مشکلات کو اجاگر کیا اور خواتین کو بااختیار بنانے اورانہیں انصاف کی فراہمی کی ضرورت پر زوردیا۔ انہوں نے کشمیری خواتین کی آواز کو بلند کرنے اور ان کے حقوق کے احترام کو یقینی بنانے کامطالبہ کیا۔اس موقع پر مقررین نے خواتین کے عالمی دن کی اہمیت کواجاگر کیا اور دنیا بھر میں خواتین کے حقوق کے احترام کی کوششوں پر زوردیا۔
