دنیا کشمیر اور فلسطین میں انسانی حقوق کی خلاف ورزیوں پر خاموش تماشائی بنی ہوئی ہے، سینیٹر ثمینہ زہری
ٓاسلام آباد: سینیٹ کی قائمہ کمیٹی برائے انسانی حقوق کی چیئرپرسن سینیٹر ثمینہ ممتاز زہری نے کہا ہے کہ دنیا کشمیر اور فلسطین میں انسانی حقوق کی خلاف ورزیوں پر خاموش تماشائی بنی ہوئی ہے۔
کشمیر میڈیا سروس کے مطابق انہوں نے کل (19اگست ) منائے جانے والے انسانیت کے عالمی دن کی مناسبت سے آج اپنے ایک بیان میں کہا فلسطین میں جاری اسرائیلی مظالم کسی کو نظر نہیں آرہے اور کشمیر اور فلسطین میں انسانی حقوق کی خلاف ورزیوں پر دنیا خاموش تماشائی بنی ہوئی ہے۔
انہوں نے کہا کہ ہزاروں بے گناہ فلسطینی مسلمان شہید ہو چکے ہیں جن میں بہت سے معصوم بچے بھی شامل ہیں۔ انہوں نے مزید کہا کہ کشمیریوں پر جاری بھارتی مظالم کیخلاف بھی اقوام متحدہ کی سلامتی کونسل سمیت دیگر بڑی طاقتوں نے کوئی بھر پور آواز نہیں اٹھائی ہے۔ثمینہ ممتاز زہری نے کہا کہ اسرائیل معصوم فلسطینیوں کے خلاف جنگ روکنے پر آمادہ نہیں ہے اور یہ سلسلہ جاری ہے۔
