مقبوضہ جموں و کشمیر
بارہمولہ میں یکے بعد دیگرے زلزلے کے دوجھٹکے
سرینگر: غیر قانونی طور پر بھارت کے زیر قبضہ جموں و کشمیر کے ضلع بارہمولہ اورملحقہ علاقوں میں منگل کی صبح یکے بعد دیگرے زلزلے کے دوجھٹکے محسوس کیے گئے۔
کشمیر میڈیا سروس کے مطابق ابتدائی رپورٹس میں زلزلے سے کسی جانی یا مالی نقصان کی کوئی اطلاع نہیں ہے ۔ زلزلہ پیما مرکز نے ریکٹر اسکیل پر زلزلے کی شدت 4.9ریکارڈ کی ہے۔
زلزلے کے جھٹکوں کے بعد ضلع بانڈی پورہ کے علاقے اوڈینا میں ایک نوجوان خاتون کی موت ہو گئی۔ اسے بجلی کی تار سے کرنٹ لگ گئی جو زلزلے کے دوران گر گئی تھی۔ پولیس کے مطابق بارہمولہ میں ایک شخص عمارت سے کود کر زخمی ہوگیا۔ اسے فوری طور پر قریبی اسپتال لے جایا گیا جہاں اس کی حالت مستحکم بتائی جاتی ہے۔
