بھارت میں آزادی اظہار جرم، اختلافِ رائے گناہ ؛ مودی سرکار میں سنسر شپ بڑھ گئی، ڈی ڈبلیو نیوز
اسلام آباد:بھارت میں مودی سرکار کے دورِ حکومت میں سنسرشپ کے رجحان میں تیزی سے اضافہ ہو رہا ہے۔مودی حکومت نے آزادی اظہار جرم اور اختلافِ رائے گناہ بنا دیا ہے۔
کشمیرمیڈیاسروس بھارت میں آزادی اظہار اور صحافت پر بڑھتی پابندیوں کے حوالے سے جرمن نشریاتی ادارے ڈوئچے ویلے (ڈی ڈبلیو )نے ایک تفصیلی رپورٹ جاری کی ہے، جس نے مودی حکومت پر سخت الزامات عائد کرتے ہوئے سنسرشپ کے بڑھتے ہوئے رجحان کو بے نقاب کیا ہے۔رپورٹ کے مطابق نریندر مودی کے دورِ حکومت میں اختلاف رائے کو گناہ سمجھا جانے لگا ہے اور میڈیا، تعلیمی ادارے حتی کہ عدلیہ بھی خوف کے سایے میں کام کر رہے ہیں۔ اسی دوران آزادی اظہار کو بھی جرم بنا دیا گیا ہے۔ڈی ڈبلیو نیوز کے مطابق مودی سرکار نے آپریشن سندورکی ناکامی کو چھپانے کے لیے آزادی اظہار کو نشانہ بنایاہے۔ اس آپریشن کی ناکامی پر نیوز ویب سائٹ "دی وائر”نے بھارتی طیارے گرنے کی درست خبر شائع کی، جس کے بعد مودی حکومت نے اس پلیٹ فارم کو بند کر کے پورے میڈیا کو خاموش رہنے کا پیغام دیا۔رپورٹ میں انکشاف کیا گیا ہے کہ بھارت دنیا میں آزادیِ صحافت کی عالمی درجہ بندی میں 180ممالک میں سے 151ویں نمبر پر ہے، جبکہ حکومت اختلافی آوازوں کو دبانے کے لیے اب تک 8ہزارسے زائد سوشل میڈیا اکائونٹس بند کر چکی ہے۔مودی حکومت نے ممتاز مسلم اسکالر علی خان محمودآباد کو جنگ مخالف پوسٹ پر گرفتار کیا اور ان کے سچ کو فرقہ واریت قرار دے کر جیل بھیج دیا۔ڈی ڈبلیو نیوز سے گفتگو کرتے ہوئے جواہر لعل نہرو یونیورسٹی کے پولیٹکل سائنٹسٹ پروفیسر اجے نے کہا کہ مودی راج میں اب صرف خاموشی محفوظ ہے، رائے دینا خود کو خطرے میں ڈالنے کے مترادف ہے۔ ان کا کہنا تھا کہ موجودہ دور میں لوگ حتیٰ کہ نجی محفلوں میں بھی اپنی رائے دینے سے گریز کرتے ہیں۔او پی جندل گلوبل یونیورسٹی کے پروفیسر دیپانشو موہن نے ڈی ڈبلیو کو بتایا کہ مودی حکومت نے آپریشن سندورکو ایک سیاسی ڈراما بنا کر انتخابی فائدے کے لیے استعمال کیا اور قومی سلامتی جیسے حساس معاملے کو ووٹ بینک میں بدل دیا۔پروفیسر موہن نے مزید کہا کہ آج بھارت میں صرف وہی استاد قابل قبول ہے جو مودی کا بیانیہ پڑھاتا ہے، باقی سب کو ملک دشمن قرار دے دیا جاتا ہے۔ان کا کہنا تھا کہ عدلیہ بھی اب حکومت کی زبان بول رہی ہے اور قومی سلامتی کے نام پر اظہارِ رائے پر قدغن لگائی جا رہی ہے۔ پروفیسر کے مطابق تعلیمی اداروں میں نصاب، تدریس اور تقرریاں اب مکمل طور پر مودی حکومت کے بیانیے کی غلامی میں ہیں، مخالف آوازوں کو نہ گرانٹ دی جاتی ہے اور نہ ہی ملازمت کا حق۔
