سرینگراوردیگر علاقوں میں پوسٹرچسپاں، کشمیریوں سے 27اکتوبر کو یوم سیاہ منانے کی اپیل

سرینگر: غیر قانونی طور پر بھارت کے زیر قبضہ جموں و کشمیر میں سرینگر اوردیگر علاقوں میں پوسٹرچسپاں کئے گئے ہیں جن میں لوگوں پر زوردیا گیا ہے کہ وہ جموں و کشمیر پر بھارت کے غیر قانونی قبضے کے خلاف 27 اکتوبر(جمعہ) کو یوم سیاہ منائیں ۔
کشمیر میڈیا سروس کے مطابق بھارت نے1947میں اسی دن حملہ کرکے کشمیری عوام کی مرضی کے بر خلاف جموں و کشمیر پر قبضہ کیاتھا۔ پوسٹروں میں کہا گیا ہے کہ کشمیری اس وقت تک اپنی جدوجہد جاری رکھیں گے جب تک وہ عالمی برادری کے وعدے کے مطابق حق خود ارادیت حاصل نہیں کر لیتے۔کل جماعتی حریت کانفرنس، ریزسٹنس یوتھ فورم، جموں و کشمیر وارثین شہدائ، جموں و کشمیر پولیٹیکل ریزسٹنس موومنٹ، جموں و کشمیر ڈیموکریٹک موومنٹ، جموں و کشمیر اسٹوڈنٹس فورم اور دیگر کی جانب سے چسپاں کیے گئے پوسٹروںمیں 27اکتوبر 1947کو تاریخ کشمیرکا سیاہ ترین دن قرار دیا گیا ہے۔ پوسٹروں میں جموں و کشمیر کے عوام اوربیرون ملک مقیم کشمیریوںسے اپیل کی گئی ہے کہ وہ 27اکتوبر کو یوم سیاہ کے طور پر منا کر جموں وکشمیر میں بی جے پی-آر ایس ایس کی بھارتی حکومت کے ہندوتوا ایجنڈے کے خلاف دیوار بن جائیں۔پوسٹروں میں کہا گیا ہے کہ بھارت تعلیمی نصاب کو تبدیل کر رہا ہے اور مقبوضہ جموں وکشمیرمیں اپنے ہندوتوا ایجنڈے کو آگے بڑھانے کے لیے مسلمان ملازمین کو برطرف کر رہا ہے۔پوسٹروں کو ٹویٹر، فیس بک اور واٹس ایپ سمیت سوشل میڈیا پلیٹ فارمز پر بھی شیئر کیاگیا ہے۔