نیشنل کانفرنس کی طرف سے عمر عبداللہ کو دراس ڈاک بنگلے تک رسائی نہ دینے کی مذمت
سرینگر 02نومبر (کے ایم ایس)
غیر قانونی طور پر بھارت کے زیر قبضہ جموں و کشمیر میں نیشنل کانفرنس نے قابض انتظامیہ کی طرف سے پارٹی کے نائب صدر عمر عبداللہ اور دیگر عہدیداروں کو دراس ڈاک بنگلے تک رسائی نہ دینے کی شدیدمذمت کی ہے۔
کشمیرمیڈیاسروس کے مطابق نیشنل کانفرنس کے رہنمائوں علی محمد ساگر، تنویر صادق، محمد اکبر لون، حسنین مسعودی، چوہدری محمد رمضان اور عبدالرحیم راتھر نے عمر عبداللہ کو کارگل کا دورہ کرنے سے روکنے پر قابض انتظامیہ کی شدید مذمت کی۔انہوں نے کہا کہ پارٹی کے نائب صدر کو کارگل کا دورہ کرنے سے روکنے کا واحد مقصد لداخ انتظامیہ کی ناکامیوں کی پردہ پوشی تھا ۔ انہوں نے کہاکہ عمر عبداللہ کے علاقے کے دورے کامقصد مقامی آبادی کو درپیش مسائل کو اجاگر کرنا تھا۔نیشنل کانفرنس کے رہنمائوں نے کہا کہ قابض انتظامیہ حزب اختلاف کی آوازوںکو دبانے کیلئے اوچھے ہتھکنڈے استعمال کر رہی ہے کیونکہ مودی حکومت اپنی پالیسیوں اور طرز عمل کے خلاف تنقیدی آوازوں کو سننا نہیں چاہتی۔
