بھارت کی پاکستان میں مداخلت پر مبنی لالی ووڈ کی فلم ڈھائی چال کا ٹریلر ریلیز
اسلام آباد 02مارچ (کے ایم ایس)
پاکستان میں بھارتی مداخلت پر مبنی لالی ووڈ کی فلم ”ڈھائی چال ”کا ٹریلر ریلیزکردیاگیا ہے ۔
کشمیرمیڈیاسروس کے مطابق پاکستان میں شمعون عباسی اور عائشہ عمر کی آنے والی ایکشن تھرلر فلم ڈھائی چال جوبھارت کی پاکستان میں مداخلت پر مبنی ہے کا پہلا ٹریلر جاری کردیا گیاہے ۔ڈھائی چال کو تین سال قبل 2019 میں بنانے کا اعلان کیا گیا تھا اور امکان تھا کہ اسے 2020کی پہلی سہ ماہی میں ریلیز کردیا جائے گا، تاہم ایسا نہ ہوسکا۔مسلسل تاخیر کے بعد اب فلم کا پہلا ٹریلر جاری کردیاگیا ہے اور ممکنہ طورپر فلم رواں سال جون میںریلیز ہوگی۔ساوتھ ایشین وائر کے مطابق ہدایت کار تیمور شیرازی کی فلم کی کہانی فرحین چوہدری نے لکھی ہے جب کہ اسے ڈاکٹر عرفان اشرف نے پروڈیوس کیا ہے۔فلم کی مرکزی کاسٹ میں ہمایوں اشرف، عائشہ عمر، شمعون عباسی، عدنان شاہ ٹیپو، سلیم معراج، اریج چوہدری اور رشید ناز سمیت دیگر اداکارشامل ہیں ۔ فلم کی کہانی پاکستان میں بھارتی مداخلت اور دہشت گردی کے گرد گھومتی ہے۔فلم کے ٹریلر میں اہم کرداروں کو بات کرتے ہوئے دکھایا گیا ہے کہ جب بھی بھارت کو اپنے مذموم مقاصد پورے کرنے ہوتے ہیں تب وہ اپنے ہی شہریوں کو مار کر اس کا الزام پاکستان پرعائد کر دیتا ہے۔فلم میں عائشہ عمر کو ایک صحافی کے طور پر دکھایا گیا ہے جبکہ شمعون عباسی کے کردار کو مبہم رکھا گیا ہے۔فلم کے ٹریلر کو جاری کرتے ہوئے عندیہ دیا گیا ہے کہ اسے 17 جون تک سینما گھروں میں ریلیز کردیا جائے گا۔
