مقبوضہ جموں و کشمیر
خشک موسم کے باعث مقبوضہ جموں وکشمیر کے جنگلات میں آگ لگنے کے واقعات میں اضافہ
سرینگر: غیر قانونی طور پر بھارت کے زیر قبضہ جموں و کشمیر میں مسلسل خشک موسم کے باعث جنگلوں میں آگ لگنے کے واقعات میں اضافہ دیکھنے میں آیاہے۔
گاندربل، شوپیاں، کولگام، پلوامہ، بارہمولہ، بانڈی پورہ، اوڑی اور ڈوڈہ اضلاع کے مختلف علاقوں میں جنگلات میں آگ بھڑک اٹھی۔ ان علاقوں میں آگ لگنے کے واقعات گزشتہ کئی دنوں میں رپورٹ ہوئے ہیں۔ محکمہ موسمیات کے ایک مقامی عہدیدارنے بتایا کہ جنگلوں میں آگ لگنا مقبوضہ جموں و کشمیر میں مسلسل خشک موسم کا نتیجہ ہے۔ انہوں نے کہا کہ ماضی میں بھی ایسے واقعات دیکھنے میں آئے ہیں۔ایک آزاد ماہرموسمیات نے بتایا کہ ایک ماہ سے زائد عرصے تک مسلسل خشک موسم نے پودوں میں نمی کی سطح کو نمایاں طور پر کم کر دیا ہے جس سے جنگلات آسانی سے آگ پکرتے ہیں۔
