التجا مفتی کی اپنی والدہ کے خلاف ایف آئی آر کے اندراج کی مذمت
سرینگر: بھارت کے غیر قانونی زیر قبضہ جموں وکشمیر میں پیپلز ڈیموکریٹک پارٹی (پی ڈی پی) کی رہنما التجا مفتی نے اپنی والدہ اور پارٹی سربراہ محبوبہ مفتی کے خلاف ایف آئی آر کے اندراج کی شدید مذمت کی ہے۔
کشمیر میڈیا سروس کے مطابق التجا مفتی نے سری نگر میں ایک پریس کانفرنس سے خطاب کرتے ہوئے کہا کہ بھارتی انتظامیہ اس طرح کے ہتھکنڈوں سے ان کی پارٹی کو سچ بولنے سے نہیں روک سکتی۔ انہوں نے کہا کہ ہم جھکنے والے نہیں، ہم سچ بولنے اور خطے میں جمہوریت کو برقرار رکھنے کے لیے پرعزم ہیں۔
التجا نے کہا کہ پولیس نے جنوبی کشمیر میں ووٹنگ شروع ہونے سے قبل سینکڑوں پارٹی کارکنوں اور پولنگ ایجنٹوں کو بلاجواز طور پر حراست میں لیا تھا۔ التجا نے کہا کہ بھارتی حکومت اور مقبوضہ علاقے کی انتظامیہ مقبوضہ علاقے میں دہشت پیدا کرنا چاہتی ہے۔
قبل ازیں بھارتی پولیس نے پارٹی کارکنوں اور پولنگ ایجنٹوں کی گرفتاری کے خلاف احتجاج پر محبوبہ مفتی کے خلاف ایف آئی آر درج کی ہے۔
