پاکستان کشمیریوں کی بھارتی تسلط سے آزادی کی جدوجہد کی حمایت جاری رکھے گا، منیر اکرم
اسلام آباد14اگست(کے ایم ایس)
اقوام متحدہ میں پاکستان کے سفیر منیر اکرم نے کشمیری عوام کی ان کے حق خودارادیت اوربھارتیتسلط سے آزادی کی جدوجہد پر روشنی ڈالتے ہوئے کہا ہے کہ ہم اقوام متحدہ اور تمام فورمز پر کشمیر کی آزادی کے لیے آواز بلند کرتے رہیں گے۔
کشمیرمیڈیاسروس کے مطابق منیر اکرم نے یوم آزادی پاکستان کے موقع پر اقوام متحدہ کی کمیونٹی کے نام ایک پیغام میں کہا کہ ہمارے لاکھوں بھائیوں اور بہنوں نے صرف اپنے وعدے کے مطابق وطن تک پہنچنے، قومیت اور آزادی کے اپنے خواب کو پورا کرنے کے لیے اپنی جانیں قربان کیں، ہمیں ان کی بہادری، ان کے نظریات اور ان کی قربانیوں کو کبھی نہیں بھولنا چاہیے۔پاکستانی سفیر نے مزید کہا کہ آج جب ہم اپنی آزادی کا جشن منا رہے ہیں اور ہم اپنے کشمیری بھائیوں اور بہنوں کے حق خودارادیت اور آزادی کی جدوجہد میں ان کے ساتھ مضبوطی سے کھڑے ہیں۔ منیر اکرم نے کہا کہ قائد اعظم محمد علی جناح نے اتحاد، ایمان اور نظم و ضبط کے اصولوں کو قوم کی تعمیر کا بنیادی ستون قرار دیا، ہمیں قائداعظم کے وژن کو عملی جامہ پہنانے اور اپنے معاشرے کو سب کے لیے انسانی، جامع اور رواداری پر مبنی بنانے کے لیے دن رات کام کرنا چاہیے۔
