حریت قیادت کی کشمیریوں کی نسل کشی کے خلاف جمعہ کو مکمل ہڑتال کی اپیل
سرینگر 16مارچ (کے ایم ایس) بھارت کے غیر قانونی زیر قبضہ جموں و کشمیر میں کل جماعتی حریت کانفرنس نے کشمیری عوام سے اپیل کی ہے کہ وہ بھارتی فوجیوں کی طرف سے جاری قتل وغارت،گرفتاریوں اور انسانی حقوق کی دیگر خلاف ورزیوں کے خلاف جمعہ 18مارچ کو مکمل ہڑتال کریں۔
کشمیرمیڈیا سروس کے مطابق کل جماعتی حریت کانفرنس کی قیادت نے سرینگر میں جاری ایک بیان میں مقبوضہ علاقے میں بے گناہ نوجوانوں کے قتل میں اضافے کی شدیدمذمت کرتے ہوئے کہا کہ بھارتی فورسز کشمیریوں کی منظم نسل کشی میں مصروف ہیں۔واضح رہے کہ قابض فورسز نے جمعرات سے مقبوضہ علاقے میں محاصرے اور تلاشی کی پرتشدد کارروائیوں کے دوران 11نوجوانوں کو شہید اور ایک درجن سے زائد رہائشی مکانات کو تباہ کیا ہے۔بھارتی ریاستی دہشت گردی کی تازہ کارروائیوں کے دوران سرینگر، پلوامہ، گاندربل اور کپواڑہ میں شہید ہونے والے نوجوانوں کو شاندار خراج عقیدت پیش کرتے ہوئے بیان میں کہا گیا کہ وہ دن دور نہیں جب شہدا ء کا خون رنگ لائے گا۔حریت قیادت نے اقوام متحدہ، او آئی سی اور انسانی حقوق کے بین الاقوامی اداروں سے اپیل کی کہ وہ کشمیر میں بھارتی ریاستی دہشت گردی کا سخت نوٹس لیں اور بھارت کو پابند بنائیں کہ وہ کشمیر کے حوالے سے بین الاقوامی سطح پر کئے گئے اپنے وعدے پورے کرے۔
