کھانسی کے بھارتی شربت کی تیاری میں نقائص پائے گئے
نئی دلی13اکتوبر(کے ایم ایس) ورلڈ ہیلتھ آرگنائزیشن(ڈبلیو ایچ او)کے طرف سے اس بات کے انکشاف کہ بھارت میں بنا کھانسی کا شربت پینے سے افریقی ملک گامبیا میں 66بچے فوت ہوچکے ہیں ، بھارتی ریاست ہریانہ نے شربت کی تیاری پر پابندی لگا دی ہے۔
کشمیر میڈیاسروس کے مطابق ڈبلیو ایچ اور نے تقریباً ایک ہفتہ قبل بھارتی شربت کے حوالے سے آگاہ کر دیا تھا اور اسکے استعمال کے حوالے سے محتاط رہنے کی ہدایت کی تھی۔ شربت بنانے والی ہریانہ کی کمپنی میڈن فار ما سیوٹیکلس میں دوا کی تیاری میں بڑی بے قاعدگیاں پائی گئی ہیں۔ہریانہ کے وزیر صحت انیل وج نے بتایا کہ مرکزی اورہریانہ کے ریاستی محکمہ ادویہ کے مشترکہ معائنے میںپتہ چلا ہے کہ دوا کی تیاری میں کافی نقائص پائے جاتے ہیں جسے مدنظر رکھتے ہوئے اسکی مزید تیاری روک دینے کا فیصلہ کیا گیا ہے ۔ انہوںنے کہا کہ کمپنی دوا کی تیاری کیلئے استعمال کیے گئے سازو سامان کی فہرست پیش کرنے سے بھی قاصر رہی ہے ۔ ہریانہ کے ڈرگس کنٹرولر نے کمپنی کو جواب داخل کرانے کیلئے سات روز کی مہلت دی ہے جس کے بعد اسکا مینو فیکچرنگ لائسنس معطل کیا جاسکتا ہے۔
