کیرالہ : مندر میں دھماکے سے 150سے زائد افراد زخمی ہو گئے
نئی دلی :بھارتی ریاست کیرالہ کے ایک مندر میں دھماکے سے 150سے زائد افراد زخمی ہو گئے ہیں ۔
کشمیرمیڈیاسروس کے مطابق کیرالہ کے ضلع کاسرگوڈ میں نیلیشورم کے قریب ایک مندر میں دیوالی کی تقریبات میں آتش بازی کے دوران دھماکے سے 150سے زائد افراد زخمی ہو گئے جن میں سے 8کی حالت تشویشناک بتائی جاتی ہے ۔ مقامی لوگوں کے مطابق دیوالی کے جشن کیلئے جس جگہ پٹاخے رکھے گئے تھے وہاں آگ لگنے سے زبردست دھماکاہوا اور آگ لگ جس کی وجہ سے بڑی تعداد میں لوگ جھلس گئے ۔ زخمیوں کو کاسرگوڈ، کننور اور منگلورو کے ہسپتالوں میں منتقل کیاگیا ہے۔ زخمیوں میں بیشتر خواتین اور بچے ہیں۔ پولیس نے مقدمہ درج کر کے مندر کے سیکریٹری اور صدر سمیت تمام عہدیداروں کو حراست میں لے لیا ہے ۔ پولیس کا کہنا ہے کہ آتش بازی کے دوران حفاظتی انتظامات مکمل نہیں کئے گئے تھے ۔عینی شاہدین کے مطابق دھماکے کی آواز دو ردور تک سنی گئی اور لوگ شدید خوفزدہ ہو گئے ۔
