برسلز:انسانی حقو ق کے عالمی دن کے موقع پر یوتھ کانفرنس کا انعقاد
برسلز :انسانی حقوق کے عالمی دن کے موقع پر کشمیر کونسل ای یو کے زیر اہتمام یورپی پریس کلب برسلز میں کشمیریوں کے انسانی حقوق کے حوالے سے آگاہی کیلئے یوتھ کانفرنس منعقد کی گئی۔
کشمیرمیڈیاسروس کے مطابق ”امن کی جانب: مسئلہ کشمیر کے حل کے لیے کشمیریوں کے انسانی حقوق کے احترام کی ضرورت”کے عنوان سے کانفرنس میں بڑی تعدادمیں نوجوانوں خاص طور پر طلبا نے شرکت کی ۔ کانفرنس میں مقبوضہ کشمیر میں بھارتی قابض فورسز کے ہاتھوں بڑی پیمانے پر جاری انسانی حقوق کی خلاف ورزیوں کواجاگر کیاگیا۔کانفرنس کے مقررین میں چیئرمین کشمیرکونسل ای یو علی رضا سید، ممتاز دانشور شیراز راج اور مقامی کونسلر چوہدری محمد ناصر، یورپی دانشور اندرے بارکس، پروفیسر روبینہ شاہ اور متحرک طلبا سلیمان صدیق، زروان غامدی، امینہ اقبال، شہزاد نواز، سید جعفر شاہ اور سید ہادی شاہ شامل تھے۔ مقررین نے مقبوضہ کشمیر میں انسانی حقوق کی سنگین خلاف ورزیاں رکوانے کی اپیل کی۔ انہوں نے یورپی یونین اور دیگر بین الاقوامی اداروں پرزوردیاکہ وہ کشمیری عوام کے بنیادی حقوق کی بحالی کے لیے موثر کردار ادا کریں اور خاص طور پر حق خودارادیت کے حصول میں کشمیریوں کی مدد کریں۔مقررین نے مسئلہ کشمیر کو اجاگر کرنے کے لیے یورپ کے مختلف ملکوں کے نوجوانوں میں آگاہی پیدا کرنے کی ضرورت پربھی زور دیا۔انہوں نے کہاکہ انسانی حقوق کا عالمی دن دنیا بھر میں انسانی حقوق کی خلاف ورزیوں کے خلاف آواز بلند کرنے اور متاثرہ افراد کے ساتھ یکجہتی کا موقع فراہم کرتا ہے۔انہوں نے مزید کہا کہ انسانی حقوق کی خلاف ورزیوں کو روکنے میں یورپی یونین کا کردار اہم ہے اور اہم توقع رکھتے ہیں کہ یورپی یونین کشمیریوں کے حقوق کی پامالیوں کو روکنے کے لیے بھی اقدامات کرے گی۔ علی رضا سید نے اس کانفرنس کے انعقاد کو مسئلہ کشمیر پر کشمیرکونسل ای یو کی آگاہی مہم کی کامیابی قرار دیا۔ انہوں نے کہاکہ یورپی نوجوان کشمیریوں کے انسانی حقوق کو بہتر طور پر اجاگر کرسکتے ہیں۔کانفرنس کے اختتام پر کشمیری عوام کے حق خودارادیت کی حمایت اور انسانی حقوق کے احترام کو یقینی بنانے کی ضرورت پر زور دیا گیا اور تاکید کی گئی کہ مقبوضہ کشمیر میں انسانی حقوق کی پامالیاں بند ہونے سے مسئلہ کشمیر کے منصفانہ حل کی راہ ہموار ہوگی۔
واضح رہے کہ انسانی حقوق کا عالمی دن ہر سال 10 دسمبر کو منایا جاتا ہے، یہ دن 1948میں اقوام متحدہ کی انسانی حقوق کے عالمی اعلامیہ کی منظوری کی یاد میں منایا جاتا ہے۔
