تحریک جوانان کشمیر کے زیر اہتمام جہلم ویلی میں ریلی اورتقریب کا انعقاد
کشمیری عوام اپنی جدوجہد آزادی میں تنہا نہیں ہیں ،مقررین
مظفرآباد:
تحریک جوانان کشمیر اور پاکستان ذندہ باد بیسک آرگنائزیشن کے زیر اہتمام یوم یکجہتی کشمیر کے حوالے سے کنٹرول لائن سے ملحقہ ضلع چکوٹھی کی جہلم ویلی میں شاندار ریلی اور تقریب کا انعقاد کیاگیا۔
کشمیرمیڈیاسروس کے مطابق ریلی میں کشمیری عوام کی بڑی تعداد کے علاوہ سیاسی و سماجی شخصیات اور اساتذہ اور سکولوں کے بچوں نے شرکت کی ۔ ریلی کے شرکا نے تحریک آزادی کشمیر کے حق میں اور بھارت مخالف فلک شگاف نعرے بلند کئے ۔ریلی کے اختتام پر ایک پروقار تقریب منعقد کی گئی جس کے مہمان خصوصی صدر تحریک جوانان کشمیر سردار اجمل مغل تھے ۔ تقریب کی صدارت پاکستان ذندہ باد بیسک آرگنائزیشن کے رہنماء عاصم بشیر نے کی ۔ سردار اجمل مغل نے اپنے خطاب میں کہا کہ دنیا بھر میں مقیم پاکستانیوں اور کشمیریوں نے یوم یکجہتی کشمیر بھرپور طورپرمناکر واضح کردیاہے کہ مقبوضہ جموں وکشمیر کے مظلوم عوام بھارتی تسلط سے آزادی کی اپنی جدوجہد میں تنہا نہیں ہیں ۔انہوں نے کہا کہ بھارتی ظلم وبربریت کی یہ سیاہ رات انشا اللہ جلد ختم ہو گی اور کشمیری عوام بھارتی تسلط سے ایک دن ضرور آزادی حاصل کریں گے ۔انہوں نے کہاکہ تمام تر ظلم و بربریت کے باجود بھارت کشمیریوں کے جذبہ حریت کو کمزور کرنے میں بری طرح ناکام رہا ہے ۔اس موقع پر خطاب کرتے ہوئے تحریک جوانان کشمیر کے چیف آرگنائزر ڈاکٹر راجہ زاہد خان ، پاکستان ذندہ باد بیسک آرگنائزیشن کے رہنماء عاصم بشیر اوردیگر مقررین نے اپنے خطاب میں کہاکہ تحریک جوانان پاکستان کشمیر کی قیادت کا کنٹرول لائن پر موجود ہونا واضح پیغام دیاہے کہ وہ تحریک آزادی میں کشمیری عوام کے شانہ بشانہ ہیں۔ انہوں نے عالمی برادری پرزوردیاکہ وہ کشمیریوں کو انکا حق خودارادیت دینے کیلئے بھارت پر دبائو بڑھائیں جس کا وعدہ بھارت نے اقوام متحدہ میں کشمیریوں سے کیاتھا۔تقریب سے تحریک جوانان کشمیر خواتین ونگ کی صدر ڈاکٹر تہنیت اقبال اعوان، ڈویژنل صدر سردار طارق محمود جنجوعہ ، یاسر شفیق اعوان ، عاقب الرحمن اعوان ، غلام نبی شاہ ذیشان حیدر ، مومنہ پرویز اوردیگر نے بھی خطاب کیا ۔ تقریب کے دوران مختلف سکولوں کے بچوں نے ٹیبلوز پیش کر کے تحریک آزادی کشمیر کے شہدا کو خراج عقیدت پیش کیا ۔
