بھارتی معاشرے میں حجاب پہننے والی لڑکیوں کو نشانہ بنانا بند کیا جائے : مس یونیورس
نئی دہلی 28مارچ(کے ایم ایس)مس یونیورس 2021کا تاج اپنے نام کرنے والی بھارتی ماڈل اور اداکارہ ہرناز کور سندھو نے بھارتی معاشرے سے اپیل کی ہے کہ حجاب کے معاملے پرمسلمان لڑکیوں سمیت خواتین کو نشانہ بنانا بند کیاجائے اورانہیںاپنی مرضی کے مطابق زندگی گزارنے دی جائے۔
کرناٹک ہائی کورٹ کے تین ججوں کے بنچ نے حال ہی میں کئی درخواستوں کو خارج کر دیا جن میں تعلیمی اداروں کے کلاس رومز میں حجاب پہننے کی اجازت طلب کی گئی تھی۔سوشل میڈیا پر وائرل ہونے والے ایک کلپ میں ایک رپورٹر نے ہرناز کورسندھو سے حجاب کے بارے میں ان کے خیالات جاننے کی کوشش کی۔ یہ ویڈیو 17 مارچ کو مس یونیورس 2021کی وطن واپسی کے اعزاز میں منعقدہ تقریب کا حصہ ہے۔اس سے پہلے کہ وہ سوال کا جواب دیتی، آرگنائزر نے مداخلت کی اور رپورٹر کو کوئی سیاسی سوال پوچھنے سے گریز کرنے کو کہا اور میڈیا کو مشورہ دیا کہ وہ ان کے سفر، کامیابی کے بارے میں پوچھے کہ وہ کس طرح متاثر کن رہی ہیں۔رپورٹر نے جواب دیا کہ ہرناز کو وہی باتیں کہنے دیں۔چنڈی گڑھ میں مقیم ماڈل نے پھر اس بات پر اپنی ناراضگی کا اظہار کیا کہ کتنی بار بھارتی معاشرے میں لڑکیوں کو نشانہ بنایا جاتارہے گا۔آپ ہمیشہ لڑکیوں کو کیوں نشانہ بناتے ہیں؟ اب بھی تم مجھے نشانہ بنا رہے ہو۔ جیسے حجاب کے معاملے پر بھی لڑکیوں کو نشانہ بنایا جا رہا ہے۔ انہیں(لڑکیوںکو) اپنی مرضی کے مطابق زندگی گزارنے دیں، انہیں اپنی منزل تک پہنچنے دیں، انہیں اڑنے دیں، یہ ان کے پر ہیں، انہیں مت کاٹیں۔سندھو نے رپورٹر سے کہا کہ وہ ان سے ان کے سفر، رکاوٹوں اور اس سال کے شروع میں مقابلہ حسن میں کامیابی کے بارے میں پوچھے۔
