پاکستان کی جیت کے بعد بھارتی پنجاب میں ہندوتوا دہشت گردوں کے کشمیری طلباءپر حملے

سرینگر 25 اکتوبر (کے ایم ایس) آئی سی سی ٹی 20 عالمی کپ میں بھارت کے خلاف پاکستان کی جیت کے بعد بھارتی پنجاب کے مختلف کالجوں میں ہندوتوا دہشت گردوں نے کشمیری طلباءپر حملے کئے۔
کشمیر میڈیا سروس کے مطابق پنجاب کے علاقے سنگرور میں ”بھائی گرو داس انسٹی ٹیوٹ آف انجینئرنگ اینڈ ٹیکنالوجی “میں بھارتی ریاست اترپردیش اور بہار سے تعلق رکھنے والے ہندوتوا دہشت گردوں نے ہوسٹل میں گھس کر کشمیری طلباءکو بے رحمی سے مارا پیٹا۔ایک طالب علم نے فیس بک پر حملے کو براہ راست شیئر کیا جس میں حملہ آورکشمیری طلباءکے کمروں میں گھس گئے اوران پر ڈنڈوں اور لاٹھیوں سے حملہ کیا ۔بھائی گرو داس انسٹی ٹیوٹ آف انجینئرنگ اینڈ ٹیکنالوجی میں انجینئرنگ کے ایک طالب علم عاقب نے صحافیوں کو بتایا کہ اتر پردیش اور بہار کے کچھ طلباءلاٹھیوں کے ساتھ ان کے کمروں میں گھس گئے اوران پر حملہ کیا۔انہوں نے کہاکہ ہم اپنے ہوسٹل کے کمروں میں تھے اور باہر سے شور کی آواز آئی۔ ہم یہ دیکھنے گئے کہ کیا ہو رہا ہے تودیکھا کہ کچھ لوگ دوسرے بلاک میں کشمیری طلباءپر حملہ کر رہے ہیں۔ اسی کالج سے تعلق رکھنے والے ایک اور طالب علم شعیب نے بتایا کہ حملہ آوروں نے ہمارے کمروں کی کھڑکیوں کے شیشے توڑ دیے اور مسلسل ”آپ پاکستانی ہیں“کے نعرے لگا رہے تھے۔انہوں نے کہاکہ ہم نے اپنے آپ کو کمروں میں بند کر رکھا ہے۔انہوں نے کہاکہ پنجاب سے مقامی لوگ جو زیادہ تر سکھ ہیں، ہماری مدد کے لیے آئے اور انہوں نے ہمیں حملوں سے بچانے کی کوشش کی۔جموں و کشمیر اسٹوڈنٹس ایسوسی ایشن کے ترجمان ناصر کھوئی ہامی نے صحافیوں کو بتایا کہ انہیں میچ میں بھارت کی شکست کے بعد پنجاب کے مختلف کالجوں میں زیر تعلیم کشمیری طلباءکی طرف سے پریشان کن فون کالز موصول ہوئی ہیں۔انہوں نے کہاکہ مجھے ان حملوں کی جو ویڈیوز موصول رہی ہیں وہ بہت تکلیف دہ ہیں۔