بھارتی تسلط کی وجہ سے کشمیری خواتین مسلسل عدم تحفظ کا شکار ہیں، حریت رہنما
سرینگر:بھارت کے غیر قانونی زیر قبضہ جموں وکشمیر میں کل جماعتی حریت کانفرنس کے رہنماﺅں خواجہ فردوس، سید بشیر اندرابی اورمحمد شفیع لون نے کہا ہے کہ غیر قانونی بھارتی تسلط کیوجہ سے کشمیری خواتین مسلسل عدم تحفظ ، خوف و دہشت اور اذیت کا شکار ہیں۔
کشمیر میڈیاسروس کے مطابق انہوںنے آج ” خواتین کے خلاف تشدد کے خاتمے کا عالمی دن“ پر سرینگر میں جاری ایک مشترکہ بیان میں کہا کہ کشمیری خواتین بھارتی درندگی کا ڈٹ کر مقابلہ کررہی ہیں ، جدوجہد آزادی میں ان کا ایک اہم کردار ہے اور وہ بھارتی تسلط سے آزادی کیلئے اپنے لخت جگر قربان کررہی ہیں۔ انہوں نے کہا کہ بھارتی فوج کشمیری خواتین کی آبروریزی کو ایک جنگی ہتھیار کے طور پر استعمال کررہی ہے، بھارتی فوجیوں نے مقبوضہ علاقے میں اب تک ہزاروں عفت ماب خواتین کو بے حرمتی کا نشانہ بنایا ہے ، دختران ملت کی سربراہ آسیہ اندرابی ، فہمیدہ صوفی اور ناہیدہ نسرین سمیت کئی خواتین بھارتی جیلوں میں بند ہیں، بھارتی فوجیوںنے نہتے کشمیریوں کے خلاف مہلک پیلٹ بندوں کا استعمال کرتے ہوئے لڑکوں سمیت کئی کمسن بچیوںکو بھی بصارت سے محروم کردیا ہے۔
کل جماعتی حریت کانفرنس کے رہنماﺅں نے کہا کہ بھارت کشمیریوں کے جذبہ حریت کو توڑ نے کی ہر ممکن کوشش کر رہا ہے لیکن کشمیری اوچھے ہتھکنڈوں سے ہرگز مرعوب نہیں ہونگے اوروہ شہداءکے مشن کو مقصد کے حصول تک جاری رکھیں گے۔انہوںنے اقوام متحدہ سے مطالبہ کیا کہ وہ مقبوضہ علاقے میں جاری بھارتی ریاستی دہشت گردی کانوٹس لے اور مسئلہ کشمیر کے حل کے لیے بھارت پردباﺅ ڈالے۔
