”یوم یکجہتی کشمیر “:آزاد جموں وکشمیربھر میں ریلیاں ، جلسے جلوس
مظفرآباد : بھارت کے غیر قانونی زیر قبضہ جموں و کشمیر کے عوام کے ساتھ اظہار یکجہتی کے لیے آزاد جموں و کشمیر بھر میں ریلیاں اور عوامی اجتماعات کا انعقاد کیا گیا۔کشمیر میڈیا سروس کے مطابق میرپور میں یوم یکجہتی کشمیر کے موقع پر شکریہ پاکستان (شکریہ پاکستان) کے عنوان سے ایک ریلی نکالی گئی۔ تقریب کا انعقاد جموں کشمیر پیر پنجال فریڈم موومنٹ، مہاجرین اتحاد فورم اور جماعت اسلامی یوتھ آزاد کشمیر کے مشترکہ بینر تلے کیا گیا۔
ریلی کی قیادت جموں کشمیر پیر پنجال فریڈم موومنٹ کے وائس چیئرمین قاضی عمران نے کی جبکہ جماعت اسلامی میرپور کے امیر مولانا عتیق الرحمان، مہاجرین اتحاد فورم میرپور کے صدر ظہیر جرال، بشیر احمد شگو، خواجہ ایاز، اعجاز میر (صدر ضلع میرپور، میرپور چھبی کمیٹی) کے صدر چوہدری محمد رفیق اور سردار خورشید سمیت دیگر بھی موجود تھے۔ ریلی سے خطاب کرتے ہوئے رہنماو¿ں نے 5 فروری کو جموں و کشمیر کے مظلوم عوام کے لیے وقف کرنے پر حکومت، مسلح افواج اور پاکستانی عوام کا تہہ دل سے شکریہ ادا کیا۔
جموں کشمیر پیر پنجال فریڈم موومنٹ اور گورنمنٹ بوائز پرائمری اسکول مہاجر کیمپ گلپور کوٹلی کے زیرِ اہتمام ایک پروقار تقریب کا انعقاد کیا گیا، جس میں مقررین نے مقبوضہ کشمیر میں بھارتی مظالم کی شدید مذمت کی اور کشمیری عوام کے حقِ خودارادیت کی حمایت جاری رکھنے کے عزم کا اعادہ کیا۔
تقریب کی صدارت سردار حاجی محمد عارف خان، ایلیمنٹری مدرس علیم خان، نمبردار الیاس خان، سردار زمان، سردار حمید، نور احمد، راجہ نثار، چیئرمین سرفراز، صدر جموں کشمیر پیر پنجال فریڈم موومنٹ ضلع کوٹلی سردار آفتاب عارف، یونس بٹھی، چوہدری حسیب اور راجہ عقیل نے کی۔
تقریب کا آغاز اروشہ سارم نے تلاوتِ قرآن پاک سے کیا، جبکہ ریحان ریاض نے آزاد کشمیر اور پاکستان کے قومی ترانے پیش کیے۔ گورنمنٹ بوائز پرائمری اسکول کے بچوں نے بھی ملی نغمے اور تقاریر کے ذریعے یکجہتی کشمیر کے جذبے کو اجاگر کیا۔
مقررین نے کہا کہ یومِ یکجہتی کشمیر محض ایک رسمی دن نہیں، بلکہ یہ دن مظلوم کشمیریوں کی قربانیوں کو یاد رکھنے اور دنیا کے سامنے بھارتی مظالم کو بے نقاب کرنے کا موقع ہے۔انہوں نے کہا کہ بھارت کی ریاستی دہشت گردی کشمیری عوام کے جذبہ آزادی کو نہیں دبا سکتی، اور قربانیوں کا یہ سفر جلد آزادی کی منزل پر پہنچے گا۔ انہوں نے عالمی برادری پر زور دیا کہ وہ مقبوضہ کشمیر میں بھارتی فوج کے مظالم کا نوٹس لے اور کشمیری عوام کو ان کا بنیادی حق، حقِ خودارادیت دلانے میں اپنا کردار ادا کرے۔
تقریب کے آخر میں قاری و حافظ محمد ساجد نے کشمیری عوام کی آزادی، شہداءکشمیر و فلسطین کے درجات کی بلندی اور عالمِ اسلام کی سربلندی کے لیے دعا کی۔
مظفر آباد باغ، راولاکوٹ اور آزاد کشمیر کے دیگر علاقوں میں بھی ریلیاں نکالی گئیں اور دیگر پروگرام منعقد کیے گئے۔
اس موقع پر مقررین نے کشمیریوں کی جدوجہد آزادی کے لیے اپنے غیر متزلزل عزم کا اعادہ کرتے ہوئے اس عزم کا اظہار کیا کہ آخری بھارتی فوجی مقبوضہ علاقے سے نکلنے تک اپنی جدوجہد جاری رکھیں گے۔ انہوں نے زور دے کر کہا کہ پاکستانی اور کشمیری ایک ہیں اور دنیا کی کوئی طاقت ا نہیںجدا نہیں کر سکتی۔
