بھارت :اتر پردیش میں 168سال پرانی مسجد منہدم کر دی گئی

23 فروری, 2025

0 82 1 minute read

لکھنو:بھارت میں جاری” ریپڈ ریل” اور ”میٹرو کوریڈور” منصوبوں کی آڑ میں جمعہ کی رات دیر گئے میرٹھ میں 168 سال پرانی مسجد کو منہدم کردیا گیا۔
کشمیر میڈیا سروس کے مطابق مسجد منصوبے کے تعمیراتی راستے پر واقع تھی جس کو نیشنل کیپیٹل ریجن ٹرانسپورٹ کارپوریشن تعمیر کررہی ہے۔ انہدام پولیس اور حکام کی نگرانی میں عمل میں آیا۔ابتدائی طور پر جمعرات کو کچھ افراد نے ہتھوڑوں سے مسجد کے کچھ حصوں کو توڑنا شروع کیا۔ بعد ازاں جمعہ کی رات تقریبا 1:30بجے مسماری کو مکمل کرنے کے لیے بلڈوزر کا استعمال کیا گیا۔ حکام نے 20فروری کو مسجد کی بجلی منقطع کر دی تھی۔ 21فروری تک تمام اشیاء احاطے سے ہٹا دی گئیں اور جمعرات کی دوپہر تک مسماری کا کام شروع ہو چکا تھا۔این سی آر ٹی سی حکام مسلسل مسجد کو ہٹانے کا مطالبہ کر رہے تھے۔ جمعرات کی رات ایڈیشنل ڈسٹرکٹ مجسٹریٹ برجیش کمار سنگھ نے این سی آر ٹی سی حکام کے ساتھ جائے وقوعہ کا دورہ کیا اور انہدام سے قبل مقامی نمائندوں کے ساتھ بات چیت کی۔مسجد انتظامیہ کی نمائندگی کرتے ہوئے حاجی سوالہیں نے بتایا کہ ان کے پاس 1857کے قانونی دستاویزات موجود ہیں جو مسجد کی موجودگی کو ثابت کرتے ہیں۔انہوں نے کہاکہ انہدام کے دن مسجد میں جمعہ کی نماز نہیں ہوئی تھی۔