وزیراعظم شہباز شریف کی طرف سے پہلگام واقعے کی بین الاقوامی تحقیقات کی پیش کش کا اعادہ
برطانوی ہائی کمشنر سے ملاقات ،برطانیہ کو تحقیقات میں شمولیت کی دعوت
اسلام آباد:
وزیر اعظم محمد شہباز شریف نے بغیر ثبوت پیش کئے پہلگام واقعہ کا تعلق پاکستان سے جوڑنے کی بھارتی کوششوں کو مسترد کرتے ہوئے واقعے کی شفاف اور غیر جانبدار بین الاقوامی تحقیقات کی اپنی پیشکش کا اعادہ کیا ہے۔
کشمیرمیڈیاسروس کے مطابق وزیراعظم محمد شہباز شریف نے پاکستان میں برطانیہ کی ہائی کمشنر جین میریٹ سے ملاقات میں پہلگام واقعے کی شفاف اورغیر جانبدار بین الاقوامی تحقیقات کی پیش کش کا اعادہ کیا اور برطانیہ کو اس میں شمولیت کی دعوت دی۔ وزیراعظم نے برطانوی ہائی کمشنر کو پہلگام واقعہ کے بعد جنوبی ایشیا کی موجودہ صورتحال پر پاکستان کے نقطہ نظر سے آگاہ کیا۔انہوں نے کوئی ثبوت فراہم کئے بغیر اس واقعہ سے پاکستان کو جوڑنے کی بھارت کی کوششوں کو مسترد کرتے ہوئے کہا کہ حکومت کی اولین ترجیح ملک کی اقتصادی ترقی ہے اور پاکستان کبھی بھی ایسا کوئی اقدام نہیں اٹھائے گا جس سے علاقائی امن و سلامتی کو خطرہ ہو۔وزیراعظم نے کہا کہ برطانیہ پاکستان اور بھارت سے اپنے دوستانہ سفارتی تعلقات کو استعمال کرتے ہوئے خطے میں امن کی کشیدہ صورتحال کو بہتر بنانے میں اپنا کردار ادا کرے۔برطانوی ہائی کمشنر نے پاکستان کے موقف سے آگاہ کرنے پر وزیر اعظم کا شکریہ ادا کیا اور کہا کہ برطانیہ علاقائی امن و سلامتی کے لئے پاکستان اور بھارت کے ساتھ مل کر کام کرے گا۔
