حریت کانفرنس آزاد کشمیر شاخ کا مقبوضہ کشمیر اور لداخ پر پاکستان کے اصولی موقف کا خیر مقدم
اسلام آباد: کل جماعتی حریت کانفرنس آزاد جموں و کشمیرشاخ نے ترجمان دفتر خارجہ کے طاہر حسین اندرابی کی طرف سے مقبوضہ جموں و کشمیر اور لداخ پر پیش کیے گئے پاکستان کے واضح اور اصولی موقف کا خیرمقدم کیا ہے۔
کشمیر میڈیا سروس کے مطابق حریت کانفرنس آزاد کشمیر شاخ کے سیکرٹری اطلاعات مشتاق احمد بٹ نے ایک بیان میں کہا ہے کہ حریت کنوینر غلام محمد صفی نے کہا کہ یہ ایک ناقابل تردید حقیقت ہے کہ مقبوضہ جموں و کشمیر اور لداخ کبھی بھی بھارت کا حصہ نہیں رہے بلکہ یہ ایک بین الاقوامی طورپر تسلیم شدہ متنازعہ علاقے کا حصہ ہیں ، جس کا حتمی فیصلہ ابھی ہونا باقی ہے۔انہوں نے کہاکہ مقبوضہ علاقے میں بھارت کے یکطرفہ اقدامات، انتظامی تبدیلیاں اور سیاسی انجینئرنگ نہ صرف بین الاقوامی قوانین کی کھلم کھلا خلاف ورزی ہیں بلکہ یہ مقبوضہ علاقے کی متنازعہ حیثیت کو تبدیل کرنے کی بھی ایک ناکام کوشش ہے۔انہوں نے کہاکہ اقوام متحدہ کی سلامتی کونسل کی قراردادیں تنازعہ کے دیرپا حل کے لیے ایک واضح اور قابل عمل فریم ورک فراہم کرتی ہیں، جس کے تحت کشمیری عوام کو ان کا بنیادی حق خود ارادیت دیا جانا تھا۔حریت کنوینر نے کہاکہ اقوام متحدہ اپنی ذمہ داریوں کو موثر طریقے سے ادا کرے اور اپنی متعلقہ قراردادوں پر عمل درآمد کو یقینی بنائے۔ انہوں نے عالمی طاقتوں اور انسانی حقوق کی بین الاقوامی تنظیموں سے اپیل کی کہ وہ مقبوضہ کشمیر میں جاری انسانی حقوق کی سنگین خلاف ورزیوں کافوری نوٹس لیں اور کشمیری عوام کو ان کے جائز حقوق کی فراہمی یقینی بنانے کے لیے عملی اقدامات کریں۔انہوں نے واضح کیاکہ اس نے کہا کہ تنازعہ کشمیر کا منصفانہ اور دیرپا حل نہ صرف کشمیری عوام کی امنگوں کی تکمیل کے لیے ناگزیر ہے بلکہ خطے میں دیرپا امن، استحکام اور ترقی کے لیے بھی انتہائی اہم ہے ۔حریت کنوینر نے امید ظاہر کی کہ عالمی برادری دیرینہ تنازعہ کشمیر کے پر امن حل کے لیے اپنا موثر کردار ادا کرے گی تاکہ جنوبی ایشیا میں امن واستحکام قائم ہو سکے۔
