مقبوضہ جموں وکشمیر:کٹھوعہ میں ٹرک میں آگ لگنے سے ایک شخص جھلس کر ہلاک

جموں19ستمبر(کے ایم ایس) غیر قانونی طور پر بھارت کے زیر قبضہ جموں و کشمیر کے جموں خطے میں ایک شخص ٹرک میں آگ لگنے سے جھلس کر ہلاک ہوگیا ہے۔
پولیس نے بتایا کہ یہ واقعہ ضلع کٹھوعہ میں جموں-پٹھانکوٹ ہائی وے پر پیش آیا۔ پولیس نے بتایا کہ ہلاک ہونے والا شخص جس کی شناخت ابھی تک نہیں ہوسکی، ٹرک ڈرائیور کا ہیلپر تھا اور وہ جموں کی طرف سفر کر رہے تھے جب اتوار کی رات گاڑی میں اچانک آگ بھڑک اٹھی۔ڈرائیور نے جلتے ہوئے ٹرک سے چھلانگ لگا کر خود کو بچالیا لیکن اس کا ساتھی گاڑی سے باہر آنے میں ناکام رہا۔فائر ٹینڈر نے موقع پر پہنچ کر آگ پر قابو پالیا لیکن اس شخص کو بچایا نہیں جاسکا۔