بھارتی فورسز نے ترال پلوامہ میں نظربند کشمیری کا رہائشی مکان تباہ کردیا
سرینگر:)غیرقانونی طورپر بھارت کے زیر قبضہ جموں وکشمیرمیں بھارتی فورسز نے ضلع پلوامہ کے علاقے ترال میں ایک نظربند کشمیری کارکن کا رہائشی مکان تباہ کردیا ۔
کشمیر میڈیا سروس کے مطابق اس واقعے نے علاقے میں سیاسی کارکنوں کے اہل خانہ کے خلاف انتقامی کارروائیوں پر تشویش پیدا کردی ہے۔بھارتی فورسز نے ترال کے علاقے ناگہ بل میں نظربند کارکن گلزار احمد ڈار کے آبائی مکان کو تباہ کیا۔ پولیس کے مطابق مکان کو پیر کی صبح مسمار کیا گیا۔مقبوضہ جموں و کشمیر میں رہائشی املاک کی تباہی اور ضبطی نے نظربند افراد اور ان کے اہل خانہ کے حقوق کے حوالے سے سنگین خدشات پیدا کردیے ہیں۔کشمیری ایسے اقدامات کو بی جے پی کی زیرِ قیادت بھارتی حکومت اور اس کے فوجی اداروں کی جابرانہ پالیسیوں کا حصہ قرار دیتے ہیں۔ ان کا مقصد سیاسی اختلاف کو دبانا اور کشمیری عوام کے عزم کو توڑنا ہے۔
کشمیری عوام آزادانہ اور غیر جانب دارانہ رائے شماری کے ذریعے حقِ خودارادیت کا مطالبہ کر رہے ہیں جس کا وعدہ اقوام متحدہ کی قراردادوں میں کیا گیا ہے۔مکان کی مسماری سے نجی املاک کے تحفظ، حقِ رہائش اور سیاسی وجوہات کی بنا پر نظربند افراد کے اہل خانہ کو اجتماعی سزا دینے کے خدشات بھی بڑھ گئے ہیں۔حقوقِ انسانی کے کارکن مسلسل زور دیتے رہے ہیں کہ املاک کی ضبطی یا تباہی کے کسی بھی اقدام میں قانونی طریق کار اور بین الاقوامی انسانی حقوق کے معیارات کی پابندی ضروری ہے۔یہ واقعہ غیر جانب دارانہ تحقیقات، کسی بھی غیر قانونی اقدام کے ذمہ داروں کے احتساب اور شہریوں کو انتقامی کارروائیوں سے تحفظ فراہم کرنے کی ضرورت اجاگر کرتا ہے۔
