فاروق عبداللہ کامتنازعہ فلم ”دی کشمیر فائلز” پرپابندی کا مطالبہ
جموں 16مئی (کے ایم ایس)
غیر قانونی طور پر بھارت کے زیر قبضہ جموں و کشمیر میں نیشنل کانفرنس کے صدر فاروق عبداللہ نے ہدایت کاروویک اگنی ہوتری کی متنازعہ فلم ”دی کشمیر فائلز”پر پابندی کا مطالبہ کرتے ہوئے کہاہے کہ اس متنازعہ فلم سے نفرت میں اضافہ ہورہا ہے جسے روکا جانا چاہیے ۔
کشمیرمیڈیاسروس کے مطابق فاروق عبداللہ کا یہ بیان مقبوضہ علاقے کے نام نہاد ایل جی گورنر منوج سنہا سے ملاقات کے ایک دن بعد سامنے آیا ہے جس میں انہوںنے فلم میں پیش کیے گئے واقعات کو فرضی اوربے بنیاد قرار دیا۔ انہوں کہاکہ انہوں نے منوج سنہا سے ملاقات میں مقبوضہ کشمیر کی تیزی سے بگڑتی ہوئی امن و امان کی صورتحال کو اجاگر کیا ۔ انہوں نے گورنر کو مزید بتایا کہ متنازعہ فلم دی کشمیر فائلز سے خطے میں نفرت پھیل رہی ہے ۔ انہوں نے کہاکہ کشمیر فائلز میں دکھایا گیا ہے کہ ایک مسلمان ایک ہندو کو مارتا ہے ۔انہوں نے کہاکہ یہ ایک بے بنیاد فلم ہے جس سے نہ صرف بھارت بلکہ وادی کشمیر کے مسلمان نوجوانوں میں بھی نفرت پیدا کی ہے ۔فاروق عبداللہ نے کہاکہ میڈیا بھی نفرت پھیلا رہا ہے جسے روکا جانا چاہیے ۔
