(کشمیر میڈیا سروس)
اسلام آباد09مارچ(کے ایم ایس)
بھارت کی طرف سے گزشتہ سال 9مارچ کو پاکستانی حدود میں گرنے والے جوہری صلاحیت کے حامل براہموس کروز میزائل کی غیر ذمہ دارانہ اور خوفناک فائرنگ سے نام نہاد بھارتی کمانڈ اینڈ کنٹرول سسٹم کی گھمبیر ہینڈلنگ اور خوفناک تکنیکی خامیاں بے نقاب ہوگئی تھیں ۔
کشمیرمیڈیاسروس کے مطابق اس واقعہ نے میڈیا میں بھی کھلبلی مچا دی تھی اور دونوں ہمسایہ جوہری طاقتوں کے درمیان کشیدگی میں اضافہ ہوگیا تھا۔
بھارتی حکام نے اس واقعہ کو چھپانے کی ہر ممکن کوشش کی اور بعد ازاں اس کی کورٹ آف انکوائری کا حکم دیا جس کے نتیجے میں فضائیہ کے تین نچلے درجے کے افسران کو پاکستان میں میزائل کی حادثاتی فائرنگ کے الزام میں برطرف کیا گیا اور بھارتی حکومت نے انتہائی افسوسناک واقعہ کو معمول کی دیکھ بھال کے دوران تکنیکی خرابی کا ذمہ دار ٹھہرایا تھا۔ پاکستان کی طر ف سے اس سنگین واقعہ کی مشترکہ تحقیقات کا مطالبہ کئے جانے کے باوجود بھارتی حکومت نے واقعہ کی داخلی کورٹ آف انکوائری تشکیل دی جو اگست میں مکمل ہوئی۔میڈیا نے بھارتی حکام کے حوالے سے بتایا کہ انکوائری میں بھارتی فضائیہ کے بعض اہلکار معیاری آپریٹنگ طریقہ کار پر عمل کرنے میں غفلت کے مرتکب پائے گئے ۔تاہم پاکستان کے دفتر خارجہ نے بھارت کی اس انکوائری کے نتائج کو غیر تسلی بخش، ناقص اور ناکافی قرار دیاتھا۔پاکستان نے مشترکہ انکوائری کے اپنے مطالبے کااعادہ کرتے ہوئے کہا کہ بھارت نے میزائل لانچ میں کمانڈ اینڈ کنٹرول سسٹم، سیفٹی اور سکیورٹی پروٹوکول، اور میزائل لانچ میں بھارت کی تاخیر کے اعتراف سے متعلق پاکستان کی طرف سے اٹھائے گئے سوالات کو نظر انداز کیاہے۔ ماہرین کے مطابق بھارت کی جانب سے مکمل انکوائری کی ہچکچاہٹ نے نام نہاد بھارتی نیوکلیئر کمانڈ اتھارٹی میں سنگین خامیاں ظاہرہوتی ہیں ،تمام جوہری امور یا جوہری عوامل پر مشتمل فوجی حکمت عملی کے لیے نیشنل کمانڈ اتھارٹی وزیراعظم کی سربراہی میں فیصلے کرتی ہے۔بھارتی کابینہ کمیٹی برائے سلامتی نے اپنے ایک پریس بیان میں کہا کہ بھارتی سویلین سیاسی قیادت نیوکلیئر کمانڈ اتھارٹی کے ذریعہ جوہری ہتھیاروں کے استعمال کی اجازت دینے والی واحد اتھارٹی ہے۔نیوکلیئر کمانڈ اتھارٹی ایک پولیٹیکل کونسل اور ایک ایگزیکٹو کونسل پر مشتمل ہے۔ سیاسی کونسل کی سربراہی وزیراعظم کرتے ہیں یہ واحد ادارہ ہے جو جوہری ہتھیاروں کے استعمال کی اجازت دے سکتا ہے۔ ماہرین کامزید کہنا ہے کہ اس میزائل نے بھارتی اور پاکستانی فضائی حدود میں بہت سے مسافروں اور بین الاقوامی سول پروازوں کے ساتھ ساتھ زمین پر انسانی جانوں اور املاک کو خطرے میں ڈالا۔ دفاعی تجزیہ کاروں کا کہنا ہے کہ بھارت کے جدید ترین میزائل سسٹم میں حفاظتی پروٹوکول کی سخت کمی کے سوا کوئی اور ممکنہ وضاحت نظر نہیں آتی جن کا کہنا ہے کہ دوسرے لفظوں میں بھارت کی نچلے درجہ کی کمان بظاہر لانچ کوڈز کو جانتی تھی اور یہ وار ہیڈز اور دیگر کینسٹرائزڈ(مستقل طور پر مسلح)میزائلوں کے معاملے میں انتہائی خطرناک ہے۔مزید برآں اس واقعہ سے بھارتی مسلح افواج کے اہلکاروں کی تربیت اور نفسیاتی خراب جائزہ کی عکاسی ہوئی اور ان کے ارادوں پر سوالات اٹھ گئے ہیں ۔ماہرین نے کہا کہ ضبط و تحمل سے کام لے کر پاکستان نے ثابت کیا کہ وہ ایک ذمہ دار ایٹمی طاقت ہے اور اس کے پاس میزائل فائر کرنے کا جوابدہ، مرکزی اختیار ہے جس کا عالمی سطح پر اعتراف کیا گیا جسے بین الاقوامی میڈیا نے اجاگر کیا۔دوسری طرف بھارت کی سٹریٹجک فورسز کمانڈ کے سابق سویلین اور فوجی حکام نے اپنے میڈیا انٹرویوز کے دوران انکشاف کیا کہ بھارت کے بعض جوہری ہتھیار، خاص طور پر جو پاکستان کے خلاف استعمال کیے جانے کیلئے بنائے گئے ہیں، امن کے وقت بھی تیاری کی بہتر حالت میں رہے،کسی بحران میں سیکنڈوں یا منٹوں میں آپریشنل اور لانچ کرنے کے قابل تھے۔فنانشل ایکسپریس انڈیا نے کہا ہے کہ اس سے انکار نہیں کیا جا سکتا کہ میزائل کے عملے کی جانب سے اپنی متعلقہ آپریشنل اور نگرا نی کی ذمہ داریوں میں سنگین غلطیاںکی گئیں اوراس واقعہ کے بین الاقوامی سطح پر سنگین نتائج ہو سکتے تھے۔دیگر ماہرین کا کہنا ہے کہ اس واقعہ کو بھارت میں حالیہ ہندوتوا سے متاثر ہ پیش رفت اور پاکستان کے حوالے سے سینئر بھارتی وزرا کے اشتعال انگیز بیانات سے بھی جوڑا جا سکتا ہے۔ماضی میں حکمران بھارتیہ جنتا پارٹی کے مختلف ارکان کے ساتھ ساتھ ہندوتوا کے نظریہ سے وابستہ دیگر گروپوں کی جانب سے پاکستان مخالف متعدد بیانات بھی د یئے گئے تھے ۔
تازہ ترین
- مودی حکومت بیرون ملک سکھ رہنمائوں کے قتل میں ملوث ہے،امریکی میڈیا کا انکشاف
- مقبوضہ جموں وکشمیر:تیز رفتار گاڑی کی ٹکر سے ’ایس پی او‘ ہلاک
- اتر پردیش: ہندو توا ارکان نے مسلمان رکن اسمبلی کے دورے کے بعد مندر کو گنگا کے پانی سے صاف کیا
- جموں وکشمیر میں ظلم و جبر کی بھارتی پالیسی ناکام ہوچکی ہے، محبوبہ مفتی
- بھارت میں اقلیتیں ریاستی جبر کا شکار، مقبوضہ کشمیر میں مظالم انتہا تک پہنچ چکے ہیں، مقررین
- پیغمبر اسلامۖ کی شان میں گستاخی ناقابل قبول ہے : متحدہ مجلس علمائ
- بھارت :ہماچل پردیش میں دیواروں پر خالصتان کے حق میں نعرے تحریر
- سوپور میں خاتون چلتی بس سے گرنے سے جاں بحق
- اقوام متحدہ اور اوآئی سی مقبوضہ جموں وکشمیر میں اپنی ٹیمیں بھیجیں
- حریت رہنمائوں اورتنظیموں کی طرف سے توہین رسالت کے واقعے کی مذمت، ہرتال کال کی حمایت
