بھارت : امیت شاہ کے بیان کے خلاف منی پور میں طلبا ء تنظیموں کی ریلی

امپھال 19اگست(کے ایم ایس) بھارت کی شورش زدہ ریاست منی پور میں طلباء تنظیموں کے مشترکہ پلیٹ فارم جوئنٹ سٹوڈنٹس باڈی نے آج چورا چند پور میں بھارتی وزیر داخلہ امیت شاہ کے اس بیان کے خلاف احتجاجی ریلی نکالی کہ ریاست کا موجودہ بحران میانمار سے غیر قانونی تارکین وطن کی آمد کی وجہ سے پیدا ہوا ہے۔
کشمیر میڈیا سروس کے مطابق جے ایس بی نے جو زومی سٹوڈنٹس فیڈریشن (ZSF)، کوکی سٹوڈنٹس آرگنائزیشن (KSO)اور ہمار سٹوڈنٹس ایسوسی ایشن (HSA)پر مشتمل ہے، وزیر داخلہ سے اپنا موقف واضح کرنے کا مطالبہ کیا۔امیت شاہ نے 9 اگست کو پارلیمنٹ کو بتایا تھا کہ منی پور میں پڑوسی ملک میانمار سے کوکی پناہ گزینوں کی آمد سے مسائل شروع ہوئے جب وہاں کے فوجی حکمرانوں نے 2021میں عسکریت پسندوں کے خلاف کریک ڈائون شروع کیا۔انہوں نے کہاتھا کہ کوکی پناہ گزینوں نے منی پور وادی کے جنگلوں میں آباد ہونا شروع کر دیاجس سے خطے میں آبادی کا تناسب تبدیل ہونے کا خدشہ پیدا ہو گیا۔ امیت شاہ نے کہا تھا کہ بدامنی اس وقت شروع ہوئی جب یہ افواہیں گردش کرنے لگیں کہ پناہ گزینوں کی بستیوں کو گائوں قرار دیا گیا ہے۔طلباء تنظیموں نے بھارت کے سالیسٹر جنرل تشار مہتا کے اس بیان پر بھی غم وغصے کا اظہار کیا کہ RIMSاور JNIMSہسپتال کے مردہ خانوں میں پڑی زیادہ تر لاشیں غیر قانونی تارکین وطن کی ہیں۔جے ایس بی نے کہا کہ اسے کوکی اورزو قبائلیوں نے بہت سنجیدگی سے لیا ہے اور وہ سالیسٹر جنرل سے ثبوت پیش کرنے کا مطالبہ کرتے ہیں۔مظاہرین نے کہا کہ کوکی اور زو قبائل کے دانشوروں اور رہنمائوں کے خلاف ایف آئی آر درج کرنا ان کی آواز کو خاموش کرنے کی کوشش ہے۔