یاسین ملک ویڈیو کانفرنسنگ کے ذریعے جموں کی ٹاڈا عدالت میں پیش
جموں 19 اگست (کے ایم ایس) نئی دہلی کی بدنام زمانہ تہاڑ جیل میںغیر قانونی طور پر نظربند جموں و کشمیر لبریشن فرنٹ کے چیئرمین محمد یاسین ملک ویڈیو کانفرنسنگ کے ذریعے جموں میں انسداد دہشت گردی کے قانون” ٹاڈا” کے تحت قائم خصوصی عدالت میں پیش ہوئے۔
کشمیرمیڈیاسروس کے مطابق یاسین ملک کے خلاف یہ جھوٹے مقدمات کئی سال قبل درج کئے گئے تھے۔ ٹاڈا کی خصوصی عدالت نے روبیہ سعید اغوا کیس کی اگلی سماعت یکم اکتوبر کو مقرر کی ہے جبکہ ایئر فورس قتل کیس کی اگلی سماعت 16 ستمبر کو ہوگی۔محمد یاسین ملک کو بھارت کے بدنام زمانہ تحقیقاتی ادارے این آئی اے نے اپریل 2019میں جھوٹے فنڈنگ کیس میں گرفتار کیا تھا۔جموں وکشمیر لبریشن فرنٹ کے دیگر رہنما جاوید احمد میر، جاوید احمد زرگر، شوکت بخشی، منظور صوفی، اقبال گندرو، علی محمد میر اور محمد زمان میر بھی اسی جھوٹے کیس میں جموں کی ٹاڈا عدالت میں پیش ہوئے۔
