اقوام متحدہ مقبوضہ جموں وکشمیر میں بھارتی مظالم کا نوٹس لے، محمود ساغر
اسلام آباد:کل جماعتی حریت کانفرنس آزاد جموں وکشمیر شاخ کے کنوینر محمود احمد ساغر نے اقوام متحدہ اور انسانی حقوق کی بین الاقوامی تنظیموں پر زور دیا ہے کہ وہ مقبوضہ جموںوکشمیر میں بھارتی مظالم کا نوٹس لیں۔
کشمیر میڈیا سروس کے مطابق محمود احمد ساغر نے اسلام آباد میں جاری ایک بیان میں افسوس کا اظہار کیا کہ بھارتی فورسز مسلم اکثریتی علاقے کو اقلیت میں تبدیل کرنے کے لیے بڑے پیمانے پر کشمیریوں کی نسل کشی کر رہی ہیں۔
انہوں نے کہا کہ بھارت اپنے مذموم ہتھکنڈوں کے ذریعے جموں و کشمیر کی بین الاقوامی سطح پر تسلیم شدہ متنازعہ حیثیت کو تبدیل نہیں کر سکتا لہذا اسے چاہیے کہ وہ کشمیر کے حوالے سے اپنی جابرانہ پالیسی ترک کرے اور کشمیریوں کو ان کا ناقابل تنسیخ حق، حق خود ارادیت دے۔
انہوں نے کہا کہ اب وقت آگیا ہے کہ عالمی برادری مداخلت کرے اور بھارت کو مقبوضہ جموں وکشمیر میں اپنی ریاستی دہشت گردی بند کرنے اور تنازعہ کشمیر کو اقوام متحدہ کی قراردادوں اور کشمیریوں کی امنگوں کے مطابق حل کرنے پر مجبور کرے۔
