بھارت حریت رہنماﺅں کو مسلسل نظر بند رکھ کر انہیں سیاسی انتقام کا نشانہ بنا رہا ہے، حریت کانفرنس

سرینگر :بھارت کے غیر قانونی زیر قبضہ جموں وکشمیر میں کل جماعتی حریت کانفرنس نے حریت رہنماﺅں اور کارکنوں کی جھوٹے مقدمات میں مسلسل نظر بندی کی شدید مذمت کی ہے۔
کشمیرمیڈیاسروس کے مطابق کل جماعتی حریت کانفرنس کے ترجمان نے سرینگر میں جاری ایک بیان میں کہا کہ بھارت حریت رہنماوں کو جھوٹے مقدمات میں مسلسل نظر بند رکھ کو سیاسی انتقام کا نشانہ بنا رہا ہے ۔ انہوںنے کہا کہ آر ایس ایس کی سرپرستی میں قائم بی جے پی کی ہندو توا حکومت حریت رہنماﺅں کو تاحیات سلاخوں کے پیچھے رکھنے کے لیے اپنی کٹھ پتلی عدلیہ کا استعمال کررہی ہے۔ ترجما ن نے کہا کہ نئی دلی کی بدنام زمانہ تہاڑ اور دیگر جیلوںمیں نظر بند حریت رہنماﺅں کو طبی سمیت تمام بنیادی سہولیات سے محروم رکھا گیا ہے جسکی وجہ سے اکثر نظر بندوں کی صحت انتہائی گرچکی ہے اور وہ کئی عوارض میں مبتلا ہو چکے ہیں۔
ترجمان نے کہا کہ کشمیری اقوام متحدہ کی قراردادوں کے مطابق اپنے پیدائشی حق، حق خود ارادیت کا مطالبہ کر رہے ہیں جس کی پاداش میں بھارت انہیں بے انتہا مظالم کا نشانہ بنا رہا ہے ۔ انہوںنے کہا کہ جیلوں میں نظر بند تمام کشمیری حریت رہنما اور کارکن سیاسی قیدیوں کا درجہ رکھتے ہیں لہذا یہ اقوام متحدہ اور انسانی حقوق کے عالمی ادادوں کی ذمہ داری ہے کہ وہ نظر بند رہنماﺅں کی حالت زار کا نوٹس لیں اور انکی رہائی کیلئے بھارت پر دباﺅ ڈالیں۔انہوں نے واضح کیا کہ جموںوکشمیر عالمی سطح پرتسلیم شدہ ایک متنازعہ خطہ ہے اور تنازعہ کشمیر کے اقوام متحدہ کی قراردادوں اور کشمیریوں کی خواہشات کے مطابق حل تک خطے میں دیر پاامن ہرگز قائم نہیں ہوسکتا۔
کل جماعتی حریت کانفرنس کے ترجمان نے مزید کہا کہ کشمیری بدترین بھارتی ریاستی دہشت گردی کے باوجود اپنی تحریک آزادی عزم و ہمت کے ساتھ آگے بڑھا رہا ہے اور وہ شہداءکے مقدس مشن کی تکمیل تک اپنی جدوجہد جاری رکھنے کیلئے پر عزم ہیں