اسپین نے بھارت سے اسرائیل کیلئے ہتھیار لے جانیوالے بحری جہاز کو لنگر انداز ہونے سے روک دیا
میڈرڈ:اسپین نے بھارت سے ہتھیار اور دھماکا خیز مواد اسرائیل لے جانے والے بحری جہاز کو اپنی بندر گاہ پر لنگر انداز ہونے کی اجازت دینے سے انکار کر دیا ہے ۔
کشمیرمیڈیاسروس کے مطابق اسپین کے حکام نے بھارت سے 27 ٹن دھماکہ خیز مواد اسرائیل لے جانیوالے بحری جہاز کو اپنی بندرگاہ پر لنگر انداز ہونے سے روک دیا ہے ۔ہسپانوی وزیر ٹرانسپورٹ کا کہنا ہے کہ ڈنمارک کے جھنڈے والا جہاز 27ٹن دھماکہ خیز مواد چنئی بھارت سے اسرائیل کی بندرگاہ حیفہ لے جا رہا تھا۔ہسپانوی وزیر خارجہ جوز مینوئل نے کہاہے کہ اسپین اسرائیل کیلئے ہتھیاروں سے لدے بحری جہازوں کو اپنی بندرگاہوں پر بلانے کی اجازت نہیں دے گا۔انہوں نے بتایا کہ اسپین کایہ اقدام غزہ جنگ میں کیلئے اسرائیل کو ہتھیار برآمد نہ کرنے کے سرکاری فیصلے کے مطابق ہے۔ہسپانوی وزیر خارجہ نے کہا کہ مشرق وسطیٰ کو مزید ہتھیاروں کی نہیں بلکہ امن کی ضرورت ہے۔
