بھارتی تسلط سے آزادی کیلئے کشمیریوں کی قربانیاں ضرور رنگ لائیں گی، حریت رہنما
ہٹیاں بالا:
کشمیری حریت رہنماﺅں سید منظور احمد شاہ ، عزیر احمد غزالی، مشتاق الاسلام اور جماعت اسلامی کے رہنما راجہ نزاکت نے کہا ہے کہ بھارت کے غیر قانونی زیر قبضہ جموں وکشمیر کے لوگ غیر قانونی بھارتی تسلط سے آزادی کیلئے بیش بہا قربانیاں دے رہے ہیں جو ایک دن ضرور رنگ لائیں گی۔
کشمیر میڈیاسروس کے مطابق انہوں نے آزاد جموں وکشمیر کے ضلع ہٹیاں بالا میں ذرائع ابلاغ کے نمائندوں سے گفتگو کرتے ہوئے کہا کہ بھارت جموںوکشمیر پر صرف اور صرف طاقت کے بل پر قابض ہے اور وہ کشمیریوں کی آزادی کی آواز کو دبانے کے لیے ان پر مظالم کے پہاڑ توڑ رہا ہے۔
انہوںنے کہا کہ بھارت مقبوضہ علاقے میں عالمی قوانین کی دھجیاں اڑارہا ہے اور وہ علاقے میں حالات معمول کے مطابق کے ہونے کے اپنے جھوٹے بیانیے کے ذریعے عالمی برادری کو گمراہ کرنے کی کوشش کر رہا ہے۔
انہوںنے کہا کہ بھارت مقبوضہ جموںوکشمیر میں اپنے یوم جمہوریہ کے تقریبات کے انعقاد کا کوئی حقوق نہیں رکھتا کیونکہ کشمیری اسکے قبضے کو مسترد کر چکے ہیں اور وہ اس سے آزادی کے لیے لازوال قربانیاں دے رہے ہیں۔
انہوںنے کہا کہ مسئلہ کشمیر کو حل کیے بغیر خطے میں پائیدار امن وسلامتی ہرگز ممکن نہیں ۔ سید منظور احمد شاہ، عزیر غزالی ،مشتاق اسلام اورراجہ نزاکت نے عالمی برادری پر زور دیا کہ وہ نہتے کشمیریوں پر بھارتی مظالم کا نوٹس لے اور مسئلہ کشمیر کے حل کے لیے بھارتی قیادت پر دباﺅ ڈالے۔