کشتواڑ : انتظامیہ نے11 کشمیریوں کی املاک ضبط کر لیں
جموں:بھارت کے غیرقانونی زیر قبضہ جموں وکشمیر میںنئی دلی کے مسلط کردہ لیفٹیننٹ گورنر کے ماتحت انتظامیہ کیطرف سے کشمیریوں کی املاک کی ضبطی کا سلسلہ مسلسل جاری ہے۔ انتظامیہ نے اپنے تازہ اقدام میں ضلع کشتواڑ میں 11 افراد کی جائیدادیں ضبط کر لی ہیں۔
کشمیر میڈیا سروس کے مطابق پولیس کے خصوصی تحقیقاتی یونٹ ( ایس آئی یو ) نے گیارہ افراد کی کروڑوں مالیت کی اراضی ضبط کر لی۔ ضبطی کی کارروائی کی قیادت سینئر سپرنٹنڈنٹ پولیس (ایس ایس پی) جاوید اقبال اور ڈپٹی سپرنٹنڈنٹ پولیس (ڈی وائی ایس پی) وشال شرما نے کی۔
ان افراد کی جائیداد وں کی ضبطی کا جواز فراہم کرنے کیلئے ان پر آزادی پسندسرگرمیوں میںملوث ہونے کا الزام عائد کیا گیا ہے۔
یادر ہے کہ مودی حکومت نے اگست 2019میں مقبوضہ جموںوکشمیر کی خصوصی حیثیت ختم کرنے کے بعد کشمیریوں کی جائیدادیں ضبط اور سیل کرنے کا سلسلہ تیز کر دیا ہے جس کا مقصد کشمیریوں کو اپنے ہی وطن میں اجنبی بنانا اور ضبط کی جانے والی جائیدادیں بھارتی ہندوﺅں کو دیکر علاقے میں آبادی کے تناسب کو تبدیل کرنا ہے۔
