کانگریس کی وقف ترمیمی بل کی مذمت ، اسے بھارتی آئین پر حملہ قرار دیا
نئی دہلی: بھارت میں کانگریس نے وقف ترمیمی بل 2024 کی شدید مذمت کی اور اسے بھارتی آئین پر حملہ قرار دیتے ہوئے کہاکہ بی جے پی ملک کی سماجی ہم آہنگی کو نقصان پہنچانے کی کوشش کررہی ہے۔
کشمیرمیڈیاسروس کے مطابق کانگریس کے جنرل سکریٹری جے رام رمیش نے ایک بیان میں کہا کہ یہ بل بی جے پی کی وسیع تر حکمت عملی کا حصہ ہے جس کا مقصد پروپیگنڈہ پھیلا کر اورتعصب پیدا کرکے اقلیتی برادریوں کو بدنام کرناہے۔رمیش نے بل کو سنگین خامیوں پر مبنی قراردیتے ہوئے کہا کہ یہ ان آئینی دفعات کو نقصان پہنچاتا ہے جو مذہب سے قطع نظر تمام شہریوں کے لیے مساوی حقوق کی ضمانت دیتی ہیں۔انہوں نے کہا کہ وقف ترمیمی بل بی جے پی کی حکمت عملی کا حصہ ہے اور ہمارے منفرد کثیر مذہبی معاشرے میں صدیوں پرانے سماجی ہم آہنگی کو نقصان پہنچانے کی مسلسل کوشش ہے۔کانگریس رہنمانے کہا کہ یہ بی جے پی کی حکمت عملی اور اقلیتی برادریوں کی روایات اور اداروں کو بدنام کرنے کی مسلسل کوششوں کا حصہ ہے تاکہ ہمارے معاشرے کو انتخابی فوائد کے لیے مستقل طورپر تقسیم کیا جا سکے۔
