حریت کانفرنس آزاد کشمیر شاخ کی طرف سے بھارتی جارحیت کی شدید مذمت
شہید محمد اشرف خان صحرائی کو چوتھی برسی پر شاندار خراج عقیدت
اسلام آباد:
کل جماعتی حریت کانفرنس آزاد کشمیر شاخ نے پاکستان اور آزاد کشمیر پر بھارتی جارحیت کی شدید مذمت کی ہے ۔
کشمیرمیڈیاسروس کے مطابق کشمیری حریت قیادت نے اسلام آباد میں منعقدہ ایک تعزیتی اجلاس میںپاکستان کی حکومت ، عوام اورمسلح افواج کے ساتھ بھرپوریکجہتی کا اظہارکیااور پاک فضائیہ کی طرف سے بھارت کو منہ توڑ جواب دینے پر افواج پاکستان کو خراج تحسین پیش کیا۔انہوں نے کہاکہ حریت کانفرنس اور کشمیری عوام پاکستان عوام، حکومت اور مسلح افواج کے شانہ بشانہ ہیں ۔ کنوینر غلام محمد صفی کی زیر صدارت تعزیتی اجلاس بابائے حریت سیدعلی گیلانی کے قریبی رفیق شہید محمد اشرف خان صحرائی کی چوتھی برسی کے سلسلے میں منعقدہوا۔ اجلاس میں شہید رہنماء کو شاندار خراج عقیدت پیش کیاگیااور شہداء کے مشن کو ہر قیمت پر اسکے منطقی انجام تک جاری رکھنے کے کشمیریوں کے عزم کا اعادہ کیاگیا۔ مقررین نے شہید رہنماء کی زندگی، ان کی قربانیوں اور تحریک آزادی کشمیر کے لیے انتھک جدوجہد کو اجاگر کیا۔ ان کا کہناتھا کہ اشرف خان صحرائی تحریک آزادی کشمیر کا روشن ستارہ تھے جنہوں نے اپنی پوری زندگی حق و صداقت کے لیے وقف کررکھی تھی۔اجلاس کے اختتام پر شہید اشرف خان صحرائی سمیت تمام شہدا کشمیر،شہدائے پاکستان کے ایصال ثواب ،درجات کی بلندی اور کشمیری عوام کی آزادی اور حق خودارادیت کے حصول اور زخمیوں کی جلد صحت یابی کیلئے اجتماعی دعا کی گئی۔ اجلاس میں حریت رہنما محمود احمد ساغر ،سید یوسف نسیم،میر طاہر مسعود ، پرویز احمد، نثار مرزا،محمد الطاف بٹ ،شیخ عبدالمتین،راجہ خادم حسین ،سید اعجاز رحمانی ،امتیاز وانی،زاہد صفی،میاں مظفر،چوہدری شاہین،نذیر کرنائی ، محمد اشرف ڈار شیخ عبدالماجد ،زاہد مجتبی ،سید گلشن،محمد شفیع ڈار ،عبد المجید میر،عدیل مشتاق ،منظور احمد شاہ ،خورشید میر،قاضی عمران،امتیاز بٹ،عبد الرشید بٹاور مشتاق احمد بٹ نے شرکت کی ۔
