قوم مطمئن رہے، بھارت کو جواب دینے کیلئے تیار ہیں، خواجہ آصف
گجرات کے قصائی کا غرور خاک میں ملادیا ، اعظم نذیر تارڑ
اسلام آباد:زیر دفاع خواجہ آصف نے کہا ہے کہ پاکستان کوئی بیرونی دباو¿ قبول نہیں کرے گا، قوم مطمئن رہے، جواب دینے کے لیے 200 فیصد تیار ہیں، پاکستان اپنی جوابی کارروائی میں بھارتی شہریوں کو نشانہ نہیں بنائے گا، ہم صرف فوجی تنصیبات پر حملے کریں گے۔
کشمیر میڈیا سروس کے مطابق خواجہ آصف نے قومی اسمبلی میں اظہار خیال کرتے ہوئے کہا کہ بھارتی میڈیا میں جھوٹ کا سیلاب آیا ہوا ہے، بھارت نے جس طرح ذلت اٹھائی، اس نے اپنے عوام کو مطمئن کرنا ہے، بھارت اپنے عوام کو یہ تو نہیں بتائے گا کہ سب جگہ ہمیں مار پڑ رہی ہے۔انہوں نے کہا کہ اسرائیل اور بھارت کا اتحاد فطری ہے، دونوں اسلام مخالف ہیں، ان کی اسلام دشمنی کسی سے ڈھکی چھپی نہیں۔وزیر دفاع نے کہا کہ دوست ملک کھل کرپاکستان کے ساتھ کھڑے ہیں، بھارت کے قریب ترین حلیف بھی اس کاساتھ نہیں دے رہے، پاک فوج کنٹرول لائن اور سرحد پر دشمن کا بھرپور مقابلہ کر رہی ہے۔انہوںنے کہا کہ ہم اس قت دنیا کے تمام ضروری ممالک کے ساتھ رابطے میں ہیں، خلیجی ممالک کے ساتھ روزانہ کی بنیاد پر رابطے میں ہیں، نائب وزیراعظم کا سعودی عرب، متحدہ عرب امارات اور چین کے ساتھ روزانہ کی بنیاد پر رابطہ ہے۔ان کا کہنا تھا کہ کل سے شروع کیے گئے ڈرون حملے ہماری اہم لوکیشنز لینے کے لیے کیے گئے تھے، ڈرون حملوں کو انٹرسیپٹ اس لیے نہیں کیا گیا تاکہ ہماری لوکیشنز ٹریس نہ ہوں، جب ڈرونز مناسب فاصلے پر آئے تو انہیں مار گرایا۔وزیر دفاع نے مزید کہا کہ اب بھی جوابی کارروائی رات دن جاری ہے، اس وقت ہماری افواج بہترین پوزیشن میں ہیں، پاکستانی افواج بہادری سے ملک کا دفاع کر رہی ہیں۔
وفاقی وزیرقانون اعظم نذیر تارڑ نے اپنے خطاب میں کہا کہ پاک فوج کو یہ اختیار دیا گیا ہے کہ وہ جتنا چاہے جواب دے، ہمارے جوانوں نے اپنے معصوم شہریوں کی شہادت کا بدلہ ان کے فوجی مار کے دیا ہے، سفید جھنڈے ایسے ہی نہیں لہرائے جاتے،انہوں نے اپنے فوجیوں کی لاشیں اٹھائی ہیں۔انہوں نے کہا کہ مودی کا غرور خاک میں ملا دیا گیا ہے، پہلگام واقعے کے بعد پاکستان نے اقوام عالم کے سامنے اپنا مقدمہ رکھا، پاکستان نے دنیا کو بتایا کہ ہم دہشتگردی کا شکار ہیں، دہشتگردی کے تانے بانے ہم سے نہیں ملتے۔
وفاقی وزیر قانون نے کہا کہ ہم نے آزادانہ تحقیقات کی پیشکش کی جسے اقوام متحدہ سے سیکرٹری جنرل نے بھی سراہا، دنیا نے اس معاملے میں ہمارے موقف کو سراہا۔انہوں نے کہا کہ گجرات کا قصائی اگر کہے کہ سرحد پار سے دہشتگردی ہوئی ہے تو اس سے بڑا جھوٹ نہیں ہوسکتا۔KMS-16/M
